ریاض: پاکستان کی ایران امریکہ کشیدگی کم کرنے کوششوں پر اعلیٰ حکومتی و عسکری قیادت کو خراج تحسین، خصوصی تقریب ریاض میں منعقد

رپورٹ عالم خان مہمند :پی این نیوز ایچ ڈی

پاکستان کی طرف سے ایران اور امریکہ کے درمیان جنگ بندی اور مذاکرات کی کوششوں کو سراہتے ہوئے ریاض میں ایک خصوصی تقریب کا اہتمام کیا گیا جس میں وزیراعظم شہباز شریف اور آرمی چیف فیلڈ مارشل سید عاصم منیر کو خراج تحسین پیش کیا گیا۔

خصوصی تقریب کے مہمانانِ خصوصی جدہ سے تشریف لائے سابقہ مشیر برائے وزیراعلیٰ پنجاب چوہدری اظہر عباس وڑائچ اور چیئرمین پاک میڈیا جرنلسٹ فورم انٹرنیشنل چوہدری نورالحسن گجر تھے۔

تقریب کے میزبان سنئیر لیگی رہنما چوہدری خادم حسین بجاڑ نے تمام شرکاء اور مہمانوں کا خیرمقدم کرتے ہوئے ان کی کمیونٹی خدمات پر خراج تحسین پیش کیا۔

انہوں نے خاص طور پر حکومت پاکستان کی جانب سے حالیہ ایران امریکہ کشیدگی کو کم کرنے کی کوششوں پر دنیا بھر میں سفارتی سطح پر پاکستان کا نام روشن کرنے پر وزیراعظم اور آرمی چیف کو خراج تحسین کیا۔

اس موقع پر سینیئر لیگی رہنما خالد اکرم رانا، چوہدری عبدالمجید گجر ،چوہدری ناصر محمود آرائیں ،سینیئر صحافی عثمان منظور، صحافی و اینکر پرسن حافظ عرفان کھٹانہ اور دیگر نے بھی مہمانوں کو خوش آمدید کہا اور حکومت کی خارجہ پالیسیوں کو سراہتے ہوئے ان پر روشنی ڈالی۔

تقریب کے مہمان خصوصی چوہدری اظہر عباس وڑائچ اور چوہدری نورالحسن گجر نے اپنے خطاب میں تمام شرکاء اور میزبان کا شکریہ ادا کرتے ہوئے کہا:
"جو محبت ہمیں ریاض میں ملی، اسے ہمیشہ یاد رکھیں گے۔ اوورسیز پاکستانیوں کے درمیان اس وقت اتحاد وقت کی ضرورت ہے۔ پاک سعودی تعلقات اس وقت بلندیوں کی طرف گامزن ہیں۔”

ان کا مزید کہنا تھا:
"دنیا بھر میں ہمارے فیلڈ مارشل سید عاصم منیر کے کردار نے جو عزت بنائی ہے، اس پر ہم جتنا بھی خراج تحسین پیش کریں کم ہے۔ ان کی پالیسیوں کی بدولت دنیا بھر میں مقیم اوورسیز پاکستانیوں کو عزت کی نگاہ سے دیکھا جاتا ہے اور پاکستانی پاسپورٹ کی عزت میں اضافہ ہوا ہے۔”