تعلیم، جمہوریت اور معاشی اصلاحات کے بغیر ترقی ممکن نہیں، معیشت اب بھی آئی سی یو میں ہے: سلمان اکرم راجہ

اسٹاف رپورٹ : پی این پی نیوز ایچ ڈی

پاکستان تحریک انصاف (پی ٹی آئی) کے رہنما سلمان اکرم راجہ نے کہا ہے کہ اگر پاکستان کو ترقی اور استحکام کی راہ پر گامزن کرنا ہے تو تعلیم، جمہوریت اور معاشی اصلاحات کو قومی ترجیحات میں شامل کرنا ہوگا۔

اسلام آباد میں مصطفیٰ نواز کھوکھر کے ہمراہ نیوز کانفرنس سے خطاب کرتے ہوئے سلمان اکرم راجہ نے کہا کہ تعلیم پر کم سرمایہ کاری کسی بھی قوم کی ترقی کی راہ میں سب سے بڑی رکاوٹ ہے۔ انہوں نے کہا کہ جو قومیں فی طالب علم 25 ڈالر خرچ کرتی ہیں وہ 425 ڈالر خرچ کرنے والی قوموں کا مقابلہ نہیں کر سکتیں، جبکہ چین پاکستان کے مقابلے میں تعلیم پر 17 گنا زیادہ سرمایہ کاری کر رہا ہے۔

انہوں نے کہا کہ پاکستان کی معیشت مسلسل مشکلات کا شکار ہے اور ترقی کی رفتار انتہائی سست ہے۔ ان کا کہنا تھا کہ پانچ بجٹ پیش کیے جا چکے ہیں لیکن معیشت اب بھی آئی سی یو میں ہے اور اسے بحران سے نکالنے میں کامیابی حاصل نہیں ہو سکی۔ سلمان اکرم راجہ نے کہا کہ قومیں معدنی وسائل یا پتھر بیچ کر نہیں بلکہ اپنے انسانی وسائل پر سرمایہ کاری کرکے ترقی کرتی ہیں۔

اس موقع پر مصطفیٰ نواز کھوکھر نے کہا کہ کم آمدنی والے طبقے کے لیے زندگی گزارنا دن بدن مشکل ہوتا جا رہا ہے جبکہ حکومت اپنے اخراجات کم کرنے میں ناکام رہی ہے۔ انہوں نے کہا کہ عوامی مسائل کے حل کے بغیر کوئی بھی بجٹ کامیاب قرار نہیں دیا جا سکتا۔

مصطفیٰ نواز کھوکھر کا کہنا تھا کہ ٹیکس اور عوامی سہولیات کا نظام ساتھ ساتھ چلنا چاہیے، تاہم بھاری ٹیکسوں کے باوجود شہریوں کو بنیادی خدمات میسر نہیں ہیں۔ انہوں نے کہا کہ ریاست اور عوام کے درمیان اعتماد کا فقدان بڑھتا جا رہا ہے، جسے دور کرنے کے لیے عملی اقدامات کی ضرورت ہے۔

پی ٹی آئی رہنماؤں نے حکومت پر زور دیا کہ وہ معاشی استحکام، تعلیم کے فروغ اور عوامی فلاح کے لیے مؤثر پالیسیوں کو ترجیح دے تاکہ ملک کو موجودہ چیلنجز سے نکالا جا سکے۔