پنجاب میں کمرشل اداروں پر سیوریج ٹیکس نافذ، اسپتالوں کو ہزاروں روپے کے نوٹسز جاری

اسٹاف رپورٹ : پی این پی نیوز ایچ ڈی

پنجاب حکومت نے کمرشل اداروں پر سیوریج ٹیکس کے نفاذ کا آغاز کر دیا ہے، جس کے تحت محکمہ واسا نے مختلف اسپتالوں اور طبی مراکز کو فی بیت الخلا 2500 روپے کے حساب سے ٹیکس نوٹسز جاری کر دیے ہیں.

ذرائع کے مطابق رحیم یار خان کے متعدد سرکاری اور نجی اسپتالوں کو سیوریج ٹیکس کی ادائیگی کے لیے نوٹسز بھجوائے گئے ہیں. لالہ اقبال اسپتال رحیم یار خان کے 15 بیت الخلا کے لیے ماہانہ 37 ہزار 500 روپے کا بل جاری کیا گیا ہے، جبکہ ناصر میڈیکل کمپلیکس کو 17 بیت الخلا کے حساب سے 62 ہزار 500 روپے کا نوٹس بھیجا گیا ہے.

اسی طرح ڈاکٹر اسپتال اینڈ ٹراما سینٹر کو 12 ہزار 500 روپے جبکہ دیگر نجی سرجیکل اسپتالوں اور کلینکس کو بھی فی بیت الخلا 2500 روپے کے حساب سے ٹیکس نوٹسز جاری کیے گئے ہیں.

محکمہ واسا کے مطابق ٹیکس کی عدم ادائیگی پر بعض اداروں کے خلاف قانونی کارروائی بھی عمل میں لائی گئی ہے اور ایک نجی سرجیکل کلینک کے خلاف ایف آئی آر درج کر دی گئی ہے.

ڈپٹی ڈائریکٹر واسا عامر نوید کا کہنا ہے کہ یہ دراصل سیوریج ٹیکس ہے، جس کی منظوری صوبائی کابینہ سے حاصل کی گئی ہے. ان کے مطابق یہ ٹیکس صرف کمرشل علاقوں میں واقع اداروں پر لاگو ہوگا اور اس کا مقصد سیوریج سسٹم کے اخراجات پورے کرنا ہے.

انہوں نے مزید کہا کہ زیادہ گندگی اور فضلہ پیدا کرنے والے کمرشل اداروں کو اس پالیسی کے تحت ٹیکس نوٹسز جاری کیے جا رہے ہیں، جبکہ اس اقدام سے شہری صفائی اور نکاسی آب کے نظام کو بہتر بنانے میں مدد ملے گی.