ایران نے امریکا کے ساتھ امن معاہدے کی تصدیق کر دی، "اسلام آباد اکارڈ ” پر جمعہ کو دستخط ہوں گے
اسٹاف رپورٹ : پی این پی نیوز ایچ ڈی
ایران نے امریکا کے ساتھ امن معاہدے پر اتفاق کی باضابطہ تصدیق کرتے ہوئے اعلان کیا ہے کہ دونوں ممالک کے درمیان طے پانے والی مفاہمتی یادداشت پر آئندہ جمعہ کو دستخط کیے جائیں گے.
نائب ایرانی وزیر خارجہ کاظم غریب آبادی نے اپنے بیان میں کہا ہے کہ مفاہمتی یادداشت کا متن حتمی شکل اختیار کر چکا ہے اور اس کی باقاعدہ منظوری بھی دے دی گئی ہے. انہوں نے بتایا کہ ’’اسلام آباد اکارڈ‘‘ پر جمعہ کے روز سوئٹزرلینڈ میں دستخط کیے جائیں گے.
کاظم غریب آبادی کا کہنا تھا کہ ایران معاہدے پر عملدرآمد کا خواہاں ہے، تاہم اگر کسی بھی فریق کی جانب سے معاہدے کی خلاف ورزی کی گئی تو ایران اپنے قومی مفادات کے تحفظ کے لیے ضروری اقدامات کرنے کا حق محفوظ رکھتا ہے.
دوسری جانب امریکی صدر ڈونلڈ ٹرمپ نے بھی ایران کے ساتھ امن معاہدہ مکمل ہونے کی تصدیق کرتے ہوئے اعلان کیا تھا کہ آبنائے ہرمز کو فوری طور پر کھول دیا جائے گا جبکہ امریکی بحری ناکہ بندی بھی ختم کر دی جائے گی.
صدر ٹرمپ کے مطابق امریکا اور ایران نے تمام محاذوں پر فوجی کارروائیوں کے فوری اور مستقل خاتمے پر اتفاق کیا ہے، جس میں لبنان سے متعلق معاملات بھی شامل ہیں. انہوں نے اس پیش رفت کو مشرق وسطیٰ میں امن کے قیام کی جانب ایک تاریخی قدم قرار دیا.
امریکی صدر نے اپنے بیان میں کہا کہ معاہدے کے بعد دنیا بھر کے بحری جہازوں کے لیے راستے دوبارہ کھول دیے جائیں گے، جس سے عالمی تجارت اور تیل کی ترسیل بحال ہونے میں مدد ملے گی. ان کا کہنا تھا کہ آبنائے ہرمز کی مکمل بحالی عالمی معیشت اور توانائی کی منڈیوں کے استحکام کے لیے انتہائی اہم ہے.
سیاسی مبصرین کے مطابق ایران اور امریکا کے درمیان یہ معاہدہ خطے میں کشیدگی کے خاتمے، عالمی تجارت کی بحالی اور مشرق وسطیٰ میں امن و استحکام کے فروغ کے لیے ایک اہم پیش رفت ثابت ہو سکتا ہے.
