چکوال سانحہ، بچی کی ہلاکت پر سی سی ڈی افسر گرفتار، میرٹ پر تفتیش ہوگی، سہیل ظفر چٹھہ
اسٹاف رپورٹ : پی این پی نیوز ایچ ڈی
کرائم کنٹرول ڈیپارٹمنٹ (سی سی ڈی) کے سربراہ سہیل ظفر چٹھہ نے کہا ہے کہ چکوال میں پیش آنے والے افسوسناک واقعے میں سی سی ڈی افسر نے غلط اندازے پر ضرورت سے زیادہ طاقت کا استعمال کیا، جس کے نتیجے میں ایک ننھی بچی جان کی بازی ہار گئی جبکہ دو افراد زخمی ہوئے.انہوں نے واضح کیا کہ محکمہ اپنے افسر کو بچانے کی کوئی کوشش نہیں کرے گا اور واقعے کی مکمل تحقیقات میرٹ پر کی جائیں گی.
متاثرہ خاندان کے گھر میڈیا سے گفتگو کرتے ہوئے سہیل ظفر چٹھہ نے بتایا کہ واقعہ اس وقت پیش آیا جب سی سی ڈی کی ٹیم ایک ڈکیتی کی واردات کے دوران موقع پر پہنچی. پولیس اور ڈاکوؤں کے درمیان فائرنگ کا تبادلہ ہوا، جبکہ ملزمان ایک گاڑی کے پیچھے چھپے ہوئے تھے. ان کے مطابق کافی دیر تک فائرنگ جاری رہنے کے بعد ڈاکو فرار ہوگئے، تاہم سی سی ڈی افسر کو ان کے فرار ہونے کا اندازہ نہ ہوسکا اور اس نے غلط اندازے کی بنیاد پر فائرنگ جاری رکھی، جس سے معصوم بچی جاں بحق ہوگئی.
انہوں نے کہا کہ واقعے کے فوری بعد مقدمہ درج کرکے متعلقہ افسر کو معطل کردیا گیا تھا. بعد ازاں شواہد اکٹھے کرنے کے بعد اسے گرفتار کرلیا گیا اور مجسٹریٹ کے سامنے پیش کیا گیا، جہاں سے اسے جوڈیشل ریمانڈ پر جیل بھجوا دیا گیا.
سربراہ سی سی ڈی کا کہنا تھا کہ محکمہ اس کیس میں ایک غیرجانبدار ادارے کے طور پر کام کرے گا اور دورانِ تفتیش کسی قسم کی جانبداری کا مظاہرہ نہیں کیا جائے گا. انہوں نے بتایا کہ مقدمے میں دفعہ 302 شامل کی گئی ہے، تاہم عدالت شواہد کی روشنی میں فیصلہ کرے گی کہ یہی دفعہ برقرار رہے گی یا اس میں مزید تبدیلی کی جائے گی.
سہیل ظفر چٹھہ نے متاثرہ خاندان کو یقین دلایا کہ بچی کا قتل رائیگاں نہیں جائے گا اور انصاف کی فراہمی کو یقینی بنایا جائے گا. انہوں نے کہا کہ سی سی ڈی نے گزشتہ ایک سال کے دوران صوبے اور معاشرے کے لیے اہم خدمات انجام دی ہیں، لہٰذا ایک فرد کی غلطی کو پورے ادارے کی کارکردگی پر منطبق کرنا مناسب نہیں ہوگا.
انہوں نے مزید اعلان کیا کہ اس واقعے کے بعد سی سی ڈی کے آپریشنل طریقہ کار (ایس او پیز) کا ازسرِ نو جائزہ لیا جائے گا اور انہیں مزید سخت بنایا جائے گا، جبکہ آئندہ کسی بھی افسر کی جانب سے ایس او پیز کی خلاف ورزی پر سخت قانونی کارروائی عمل میں لائی جائے گی.
