خیبرپختونخوا میں طوفانی بارشوں اور تیز ہواؤں سے تباہی، 2 افراد جاں بحق، 29 زخمی
اسٹاف رپورٹ : پی این پی نیوز ایچ ڈی
خیبرپختونخوا میں گزشتہ 24 گھنٹوں کے دوران طوفانی بارشوں، تیز ہواؤں اور آسمانی بجلی گرنے کے واقعات نے مختلف علاقوں میں تباہی مچا دی، جس کے نتیجے میں 2 افراد جاں بحق جبکہ 29 افراد زخمی ہوگئے۔ زخمیوں میں خواتین اور بچے بھی شامل ہیں.
صوبائی ڈیزاسٹر مینجمنٹ اتھارٹی (پی ڈی ایم اے) کی جانب سے جاری کردہ رپورٹ کے مطابق شدید موسمی صورتحال کے باعث متعدد علاقوں میں گھروں، دیواروں اور چھتوں کو نقصان پہنچا جبکہ مختلف حادثات بھی پیش آئے.
رپورٹ کے مطابق ضلع بنوں سب سے زیادہ متاثر ہوا، جہاں تیز ہواؤں اور بارش کے باعث گھروں کی چھتیں اور دیواریں گرنے سے ایک شخص جان کی بازی ہار گیا جبکہ 28 افراد زخمی ہوئے۔ زخمیوں میں 7 بچے اور 7 خواتین بھی شامل ہیں جنہیں طبی امداد کے لیے قریبی ہسپتالوں میں منتقل کردیا گیا.
دوسری جانب صوبائی دارالحکومت پشاور میں آسمانی بجلی گرنے کا افسوسناک واقعہ پیش آیا جس کے نتیجے میں ایک شخص جاں بحق ہوگیا۔ نوشہرہ میں تیز ہواؤں کے باعث بجلی کا کھمبا گرنے سے ایک شخص زخمی ہوا.
پی ڈی ایم اے حکام کے مطابق مختلف اضلاع سے نقصانات کی مزید اطلاعات موصول ہورہی ہیں اور مکمل اعداد و شمار جمع کیے جا رہے ہیں۔ ادارے نے متعلقہ ضلعی انتظامیہ کو متاثرہ علاقوں میں امدادی سرگرمیاں تیز کرنے اور زخمیوں کو ہر ممکن طبی سہولیات فراہم کرنے کی ہدایت جاری کردی ہے.
پی ڈی ایم اے نے شہریوں کو خراب موسمی حالات کے دوران غیر ضروری سفر سے گریز، کمزور عمارتوں اور بجلی کی تنصیبات سے دور رہنے اور احتیاطی تدابیر اختیار کرنے کی بھی ہدایت کی ہے۔ محکمہ موسمیات کے مطابق بعض علاقوں میں مزید بارشوں اور تیز ہواؤں کا امکان موجود ہے، جس کے باعث نقصانات میں اضافے کا خدشہ برقرار ہے.
