پاکستان اور چین کے سفارتی تعلقات کے 75 سال مکمل ہونے کی تقریب ریاض میں منعقد
ریاض (عالم خان مہمند): رپورٹ : رپورٹ : پی این پی نیوز ایچ ڈی
مملکت سعودی عرب کے دارالحکومت ریاض میں عوامی جمہوریہ چین کے سفیر برائے سعودی عرب چانگ ہوا کی جانب سے پاکستان اور چین کے درمیان سفارتی تعلقات کے 75 سال مکمل ہونے کے موقع پر ایک پروقار عشائیہ استقبالیہ کا اہتمام کیا گیا.
تقریب میں مملکت سعودی عرب میں پاکستان کے سفیر احمد فاروق، سفارت خانہ پاکستان کے افسران، سفارتی شخصیات اور معزز مہمانوں نے شرکت کی۔ اس موقع پر پاکستان اور چین کے درمیان دیرینہ دوستی، باہمی اعتماد اور مضبوط اسٹریٹجک شراکت داری کو خراجِ تحسین پیش کیا گیا.
مقررین نے اپنے خیالات کا اظہار کرتے ہوئے کہا کہ گزشتہ 75 برسوں کے دوران پاکستان اور چین کے تعلقات باہمی احترام، اعتماد اور مشترکہ ترقی کے اصولوں پر استوار ایک مثالی شراکت داری کی شکل اختیار کر چکے ہیں۔ انہوں نے دونوں ممالک کے درمیان مختلف شعبوں میں تعاون کو مزید فروغ دینے اور دوطرفہ تعلقات کو نئی بلندیوں تک پہنچانے کے عزم کا اعادہ بھی کیا.
تقریب نے پاکستان اور چین کے درمیان آزمودہ اور مضبوط دوستی کی عکاسی کرتے ہوئے دونوں ممالک کے مشترکہ وژن، علاقائی امن، استحکام اور عالمی سطح پر مسلسل تعاون کے عزم کو اجاگر کیا.
