پاک بحریہ کی سیکیورٹی میں متحدہ عرب امارات کے فجیرا پورٹ سے آنے والے دو تیل بردار جہاز کراچی پورٹ پر لنگر انداز

اسٹاف رپورٹ :پی این نیوز ایچ ڈی

متحدہ عرب امارات کے فجیرا پورٹ سے آنے والے دو تیل بردار جہاز پاک بحریہ کے حفاظتی حصار میں بحفاظت کراچی پہنچ گئے، جس سے ملک میں ایندھن کی فراہمی کو مستحکم بنانے میں اہم پیش رفت ہوئی ہے.

ذرائع کے مطابق دونوں جہاز متحدہ عرب امارات کے فجیرا پورٹ سے روانہ ہوئے تھے اور انہیں سکیورٹی خدشات کے پیش نظر پاک بحریہ کی نگرانی میں کراچی لایا گیا۔ کراچی پورٹ ٹرسٹ (کے پی ٹی) کے ذرائع کا کہنا ہے کہ ان جہازوں کے ذریعے تقریباً 10 سے 12 کروڑ لیٹر تیل کراچی پہنچا ہے، جو ملکی توانائی ضروریات کے لیے انتہائی اہم قرار دیا جا رہا ہے.

یہ دونوں جہاز پاکستان نیشنل شپنگ کارپوریشن (پی این ایس سی) کے ملکیتی جہاز ہیں، جن کے ذریعے تیل کی بروقت ترسیل ممکن بنائی گئی۔ حکام کے مطابق اس تیل کی آمد سے ملک میں ایندھن کی فراہمی میں بہتری آئے گی اور توانائی کے شعبے میں استحکام پیدا ہوگا.

وفاقی وزیر برائے بحری امور جنید انور نے جہازوں کی محفوظ کراچی آمد پر پاک بحریہ کی پیشہ ورانہ خدمات کو سراہتے ہوئے شکریہ ادا کیا۔ انہوں نے کہا کہ خلیج فارس میں موجود مزید دو پاکستانی جہازوں کی حفاظت کو یقینی بنایا جائے.

وزیر بحری امور نے اس سلسلے میں وزارت خارجہ کو ہدایت کی کہ وہ ایران سے فوری رابطہ کرکے ضروری اقدامات اٹھائے تاکہ خطے میں موجود دیگر پاکستانی جہازوں کی محفوظ نقل و حرکت کو یقینی بنایا جا سکے.

پی این ایس سی حکام کا کہنا ہے کہ موجودہ حالات میں تیل کی بروقت فراہمی نہایت اہم ہے اور اس اقدام سے ملک کے توانائی کے شعبے کو استحکام حاصل ہوگا.