سپریم کورٹ کا بانی پی ٹی آئی اورسابق وزیر اعظم عمران خان سے فوری ملاقات کی استدعا مسترد

اسٹاف رپورٹ :پی این نیوز ایچ ڈی

سپریم کورٹ نے بانی پاکستان تحریک انصاف (پی ٹی آئی) اور سابق وزیر اعظم عمران خان سے فوری ملاقات کی استدعا مسترد کرتے ہوئے حکومت کو نوٹس جاری کر دیا، جبکہ سماعت کے دوران سائفر کیس، القادر ٹرسٹ کیس، توشہ خانہ کیس اور 9 مئی واقعات سے متعلق اہم عدالتی پیش رفت بھی سامنے آئی.

چیف جسٹس پاکستان جسٹس یحییٰ آفریدی کی سربراہی میں دو رکنی بینچ نے بانی پی ٹی آئی سے ملاقات کی اجازت سے متعلق درخواست پر سماعت کی۔ تحریک انصاف کے رہنما اور سینئر وکیل لطیف کھوسہ نے عدالت سے اپنے موکل عمران خان سے ملاقات کی اجازت دینے کی استدعا کی، جس پر عدالت نے حکومت کو کل کے لیے نوٹس جاری کرتے ہوئے سماعت ملتوی کر دی.

چیف جسٹس پاکستان جسٹس یحییٰ آفریدی نے سماعت کے دوران ریمارکس دیتے ہوئے کہا کہ بغیر فریقِ مخالف کو نوٹس جاری کیے عدالت کوئی حکم جاری نہیں کر سکتی۔ انہوں نے کہا کہ پہلے یہ طے کرنا ہوگا کہ آیا درخواست قابلِ سماعت ہے یا نہیں، کیونکہ بانی پی ٹی آئی کے متعدد مقدمات دیگر عدالتوں میں زیرِ التوا ہیں۔ چیف جسٹس کا کہنا تھا کہ بظاہر یہ کیس غیر مؤثر ہو چکا ہے، کیونکہ جس حکم نامے کے خلاف درخواست دائر کی گئی وہ 24 اگست 2023ء کا تھا.

عدالت نے مزید کہا کہ ملاقات سے متعلق کوئی فیصلہ فریقِ ثانی کو سنے بغیر نہیں کیا جا سکتا، تاہم کل سماعت کے دوران اس معاملے پر غور کیا جائے گا۔ بعد ازاں عدالت نے کیس کی سماعت کل تک ملتوی کر دی.

اسی دوران سپریم کورٹ نے بانی پی ٹی آئی کے سائفر کیس میں بریت کے خلاف دائر اپیلوں پر تین رکنی بینچ تشکیل دینے کا حکم دے دیا۔ عدالت نے شاہ محمود قریشی کی سائفر کیس میں بریت کے خلاف اپیلوں پر بھی تین رکنی بینچ بنانے کی ہدایت جاری کی۔

عدالت نے سائفر کیس اور 9 مئی کے واقعات میں ضمانت منسوخی کی درخواستوں پر سماعت دو ہفتوں کے لیے ملتوی کر دی۔

القادر ٹرسٹ کیس میں بانی پی ٹی آئی کی ضمانت کی درخواست غیر مؤثر ہونے کی بنیاد پر خارج کر دی گئی، جبکہ اسی کیس میں ضمانت منسوخی کی درخواست بھی غیر مؤثر قرار دے کر خارج کر دی گئی۔

اسی طرح توشہ خانہ کیس میں بانی پی ٹی آئی اور بشریٰ بی بی کی ضمانت منسوخی سے متعلق درخواستیں بھی غیر مؤثر ہونے کی بنیاد پر خارج کر دی گئیں۔

علاوہ ازیں عدالت نے 9 مئی لاہور کے واقعات سے متعلق بانی پی ٹی آئی کی ضمانت منسوخی کی درخواستوں پر بھی تین رکنی بینچ تشکیل دینے کا حکم جاری کیا۔

سپریم کورٹ کی جانب سے مختلف مقدمات میں بینچز کی تشکیل اور سماعتوں کے التوا کو آئندہ عدالتی کارروائی کے لیے اہم پیش رفت قرار دیا جا رہا ہے، جب کہ بانی پی ٹی آئی سے ملاقات سے متعلق درخواست پر فیصلہ آئندہ سماعت میں متوقع ہے۔