ریاض فنانس لیڈرز حب کے زیر اہتمام مبین فیصل کے اعزاز میں خصوصی تقریب کا انعقاد
تقریب سے قبل مدثر فاروق، جو کہ ایک سینئر فنانس پروفیشنل اور پاکستانی مقیم ہیں، گزشتہ دو دنوں سے بیمار تھے، اُن کی صحت یابی کے لیے بھی دعا کی گئی۔
رپورٹ عالم خان مہمند : پی این پی نیوز ایچ ڈی
سعودی دارالحکومت ریاض میں ریاض فنانس لیڈرز حب کے زیر اہتمام سعودی عرب کے مشرقی شہر الخُبر سے تشریف لانے والے مہمانِ خصوصی مبین فیصل کے اعزاز میں ایک خصوصی تقریب کا انعقاد کیا گیا۔
تقریب کی میزبانی ضیاء مصطفیٰ اور ولی اللہ نے کی، جبکہ سعودی عرب میں مقیم پاکستانی فنانس کمیونٹی کی متعدد نمایاں شخصیات نے شرکت کی۔ اس موقع پر شرکاء نے اس بات پر زور دیا کہ پیشہ ورانہ مصروفیات کے ساتھ ساتھ سماجی اور تفریحی سرگرمیوں میں حصہ لینا ذہنی صحت اور مثبت سوچ کے فروغ کے لیے نہایت اہم ہے۔
تقریب میں شرکت کرنے والی معزز شخصیات میں ضیاء مصطفیٰ، محمد دانش، ڈاکٹر محمد عظیم، زبیر خان بلوچ، عظیم شیخ، شکیل احمد، رضوان علی، ڈاکٹر انصب، شہریار ملک، مبین فیصل اور ولی اللہ شامل تھے۔
اس موقع پر اظہارِ خیال کرتے ہوئے عظیم شیخ نے حالیہ علاقائی اور عالمی صورتحال پر گفتگو کی اور پاکستان کے ثالثی کے کردار کو سراہتے ہوئے وسطی ایشیا میں پاکستان کے ابھرتے ہوئے سفارتی اور اقتصادی کردار پر روشنی ڈالی۔
مہمانِ خصوصی مبین فیصل نے سعودی عرب کی تیز رفتار ترقی، جدید ٹیکنالوجی کے فروغ اور وژن 2030 کے تحت ہونے والی پیش رفت کو سراہتے ہوئے کہا کہ آنے والے برسوں میں سعودی عرب نہ صرف خلیجی خطے بلکہ عالمی سطح پر بھی ایک اہم معاشی اور تکنیکی مرکز کے طور پر ابھرے گا۔
ولی اللہ نے اپنے خیالات کا اظہار کرتے ہوئے کہا کہ پاکستان وسطی ایشیا سمیت عالمی سطح پر اپنی منفرد شناخت اور اہمیت کو مزید مستحکم کر رہا ہے۔
محمد دانش اور ڈاکٹر محمد عظیم نے فنانس کے شعبے میں مصنوعی ذہانت (AI) کی اہمیت پر روشنی ڈالتے ہوئے کہا کہ AI کو اسٹریٹجک منصوبہ بندی، تجزیے اور فیصلہ سازی کے لیے ایک معاون ٹول کے طور پر استعمال کیا جانا چاہیے، تاہم مکمل انحصار انسانی بصیرت اور تجربے کا متبادل نہیں ہو سکتا۔
شکیل احمد اور رضوان علی نے پاکستان کی حالیہ سفارتی کامیابیوں کو سراہتے ہوئے وزیراعظم شہباز شریف اور آرمی چیف جنرل سید عاصم منیر کی قیادت کی تعریف کی۔ انہوں نے خطے میں امن و استحکام کے فروغ کے لیے پاکستان کے کردار کو قابلِ تحسین قرار دیا۔
ڈاکٹر انصب اور شہریار ملک نے کہا کہ آنے والا دور سعودی عرب کی ترقی، جدت اور عالمی قیادت کا دور ہوگا اور دنیا مستقبل قریب میں مملکت کی مزید نمایاں کامیابیاں دیکھے گی۔
تقریب کے اختتام سے پہلے مدثر فاروق، جو کہ ایک سینئر فنانس پروفیشنل اور پاکستانی مقیم ہیں، گزشتہ دو دنوں سے بیمار تھے، اُن کی صحت یابی کے لیے بھی دعا کی گئی۔
تقریب کے اختتام پر ضیاء مصطفیٰ اور ولی اللہ نے تمام معزز مہمانوں کی شرکت پر ان کا شکریہ ادا کیا اور اس امید کا اظہار کیا کہ اس نوعیت کی ملاقاتیں پیشہ ورانہ روابط، باہمی تعاون اور فکری تبادلے کے فروغ میں اہم کردار ادا کرتی رہیں گی۔
