محسن نقوی کی حافظ نعیم الرحمان سے ملاقات، ملکی و علاقائی صورتحال پر تبادلہ خیال
اسٹاف رپورٹ : پی این پی نیوز ایچ ڈی
وفاقی وزیر داخلہ محسن نقوی نے جماعت اسلامی کے مرکز جماعت اسلامی پاکستان منصورہ کا دورہ کیا، جہاں انہوں نے امیر جماعت اسلامی حافظ نعیم الرحمان سے اہم ملاقات کی.
ملاقات کے دوران ملک کی مجموعی سیاسی، معاشی اور امن و امان کی صورتحال پر تفصیلی تبادلہ خیال کیا گیا، جبکہ ایران اور امریکہ کے درمیان حالیہ مفاہمت کے بعد خطے کی بدلتی ہوئی صورتحال بھی زیرِ بحث آئی.
دونوں رہنماؤں نے ایران اور امریکہ کے درمیان مفاہمت کو خطے میں امن، استحکام اور کشیدگی کے خاتمے کے لیے ایک مثبت پیش رفت قرار دیا۔ اس موقع پر حافظ نعیم الرحمان نے ایران امریکہ مفاہمت میں پاکستان کے مخلصانہ اور مؤثر کردار کو سراہتے ہوئے کہا کہ پاکستان کی سفارتی کاوشیں تاریخ میں یاد رکھی جائیں گی اور اس پیش رفت سے پورے خطے میں پائیدار امن کی راہ ہموار ہوئی ہے.
وفاقی وزیر داخلہ محسن نقوی نے امیر جماعت اسلامی کو ایران امریکہ مذاکرات اور اس سلسلے میں حکومت پاکستان کی سفارتی کوششوں اور اقدامات سے آگاہ کیا. انہوں نے کہا کہ وزیراعظم اور فیلڈ مارشل نے خطے میں امن و استحکام کے لیے قابلِ قدر کردار ادا کیا، جبکہ کشیدگی کے خاتمے کا کریڈٹ پاکستان کو جاتا ہے.
ملاقات میں صومالیہ میں پھنسے پاکستانیوں کا معاملہ بھی زیرِ غور آیا۔ حافظ نعیم الرحمان نے حکومت سے مطالبہ کیا کہ محصور پاکستانیوں کی فوری اور محفوظ وطن واپسی کے لیے مؤثر سفارتی اقدامات کیے جائیں.
دونوں رہنماؤں نے ملکی معیشت کی بہتری، عوام کو ریلیف فراہم کرنے اور قومی مسائل کے حل کے لیے مشترکہ کوششوں کی ضرورت پر بھی زور دیا. وزیر داخلہ محسن نقوی نے کہا کہ پاکستان کی امن کے لیے کی گئی کوششیں اللہ تعالیٰ کے فضل و کرم سے کامیاب ہوئیں، جس پر پوری قوم شکر گزار ہے.
