وفاقی وزیر مذہبی امور کا میدانِ عرفات کا دورہ، حج انتظامات کا تفصیلی جائزہ
رپورٹ ثناء شعیب، پی این پی نیوز ایچ ڈی
سردار محمد یوسف نے میدانِ عرفات کا دورہ کرتے ہوئے پاکستانی عازمینِ حج کے لیے مختص کیمپوں اور سہولیات کا تفصیلی جائزہ لیا۔ اس موقع پر سیکرٹری مذہبی امور ابرار احمد مرزا، ڈی جی حج عبدالوہاب سومرو اور ڈائریکٹر مکہ عارف اسلم راؤ بھی ان کے ہمراہ موجود تھے.
دورے کے دوران مکتب کے چیف ایگزیکٹو آفیسر بندر بن عبداللہ الراجحی نے وفاقی وزیر کو حج انتظامات اور عازمین کے لیے فراہم کی جانے والی سہولیات سے متعلق تفصیلی بریفنگ دی. بریفنگ میں بتایا گیا کہ اس سال پاکستانی عازمینِ حج کو بہتر اور معیاری سہولیات فراہم کرنے کے لیے خصوصی اقدامات کیے گئے ہیں تاکہ وہ مناسکِ حج پرسکون ماحول میں ادا کر سکیں.
سردار محمد یوسف نے کہا کہ حکومت پاکستان اس سال حج آپریشن کو مزید بہتر اور منظم بنانے کے لیے بھرپور اقدامات کر رہی ہے۔ انہوں نے کہا کہ منیٰ اور عرفات میں سرکاری عازمینِ حج کے لیے گزشتہ برسوں کے مقابلے میں بہتر سہولیات فراہم کی جائیں گی، جن میں رہائش، خوراک، طبی سہولیات اور ٹرانسپورٹ کے انتظامات شامل ہیں.
انہوں نے مزید کہا کہ سعودی حکام اور مکتب کے تعاون سے پاکستانی حجاج کرام کو بہترین خدمات فراہم کرنے کی کوشش کی جا رہی ہے تاکہ وہ مکمل یکسوئی اور اطمینان کے ساتھ اپنے مذہبی فرائض ادا کر سکیں۔ وفاقی وزیر نے انتظامی عملے کو ہدایت کی کہ تمام سہولیات کی مسلسل نگرانی کی جائے اور عازمین کو ہر ممکن سہولت فراہم کرنے میں کوئی کوتاہی نہ برتی جائے.
دورے کے اختتام پر وفاقی وزیر مذہبی امور نے حج انتظامات میں شریک پاکستانی اور سعودی حکام کی کاوشوں کو سراہتے ہوئے امید ظاہر کی کہ اس سال حج آپریشن کامیابی سے مکمل ہوگا اور پاکستانی عازمین کو مثالی سہولیات میسر آئیں گی.
