جدہ میں 2026 کی پہلی مینگو پارٹی کا انعقاد، پاکستانی کمیونٹی اور صحافی برادری کی بھرپور شرکت

رپورٹ: ثناء شعیب پی این پی نیوز ایچ ڈی

جدہ سعودی عرب کے شہر جدہ میں سال 2026 کی پہلی مینگو پارٹی کا شاندار انعقاد یونائیٹڈ جرنلسٹس فورم اور پاک اوورسیز میڈیا فورم کے اشتراک سے کیا گیا، جس میں پاکستانی صحافی برادری، سماجی شخصیات، کاروباری رہنماؤں اور پاکستانی کمیونٹی کی بڑی تعداد نے شرکت کی. تقریب کا مقصد پاکستانی آم کی عالمی شہرت کو اجاگر کرنا اور بیرونِ ملک مقیم پاکستانیوں کو اپنی ثقافت، روایات اور قومی ورثے سے جوڑے رکھنا تھا.

تقریب کے آغاز پر منتظمین نے مہمانوں کا پرتپاک استقبال کیا اور پاکستان کے مشہور و معروف آموں چونسہ، انور رٹول اور سندھڑی سے شرکاء کی تواضع کی. شرکاء نے پاکستانی آموں کے منفرد ذائقے، خوشبو اور اعلیٰ معیار کو سراہتے ہوئے اس اقدام کو پاکستان کی مثبت شناخت اجاگر کرنے کی ایک خوبصورت کاوش قرار دیا.

تقریب سے خطاب کرتے ہوئے یونائیٹڈ جرنلسٹس فورم کے چیئرمین جہانگیر خان نے کہا کہ پاکستانی آم تقریباً 4200 کلومیٹر کا سفر طے کرکے سعودی عرب پہنچتے ہیں اور یہاں کی منڈیوں میں اپنی الگ پہچان اور مقام رکھتے ہیں. انہوں نے کہا کہ پاکستانی آم نہ صرف پاکستانی کمیونٹی بلکہ عرب شہریوں میں بھی بے حد مقبول ہیں اور لوگ ہر سال اس سیزن کا بے صبری سے انتظار کرتے ہیں. ان کا کہنا تھا کہ پاکستانی آم اپنے ذائقے، خوشبو اور اعلیٰ معیار کی وجہ سے دنیا بھر میں پسند کیے جاتے ہیں.

پاک اوورسیز میڈیا فورم کے صدر راجہ شعیب الطاف نے اپنے خطاب میں کہا کہ کمیونٹی کو ایک پلیٹ فارم پر اکٹھا کرنا اور قومی روایات کو فروغ دینا وقت کی اہم ضرورت ہے. انہوں نے کہا کہ ایسی تقریبات بیرونِ ملک پاکستانیوں کے درمیان روابط کو مضبوط بنانے اور قومی یکجہتی کو فروغ دینے میں اہم کردار ادا کرتی ہیں.

معروف کاروباری و سماجی شخصیت حاجی عثمان نے کہا کہ اس نوعیت کی تقریبات کمیونٹی کے اتحاد، باہمی ہم آہنگی اور بھائی چارے کو مضبوط بنانے کا بہترین ذریعہ ہیں. ڈاکٹر ارشد خان نے پاکستانی آم کی عالمی شہرت اور اس کی معاشی اہمیت پر روشنی ڈالتے ہوئے کہا کہ پاکستان دنیا کے بہترین آم پیدا کرنے والے ممالک میں شامل ہے اور ایسی سرگرمیاں پاکستان کے مثبت تشخص کو اجاگر کرنے میں معاون ثابت ہوتی ہیں.

تقریب کے مہمانانِ خصوصی حاجی عبد الحمید اور سماجی شخصیت شریف زمان تھے. انہوں نے اپنے خطاب میں کہا کہ ایسی تقریبات پاکستانی کمیونٹی کے درمیان اتحاد، بھائی چارے اور باہمی روابط کو فروغ دینے کا مؤثر ذریعہ ہیں. انہوں نے منتظمین کی کاوشوں کو سراہتے ہوئے کہا کہ قومی روایات اور ثقافتی اقدار کو زندہ رکھنے کے لیے اس نوعیت کی سرگرمیوں کا تسلسل خوش آئند ہے.

زبیر خان سمیت دیگر مقررین نے بھی اظہارِ خیال کرتے ہوئے کہا کہ مینگو پارٹی ایک شاندار روایت بن چکی ہے جس میں پاکستانی کمیونٹی اور صحافی برادری ہمیشہ بھرپور شرکت کرتی ہے. ان کا کہنا تھا کہ یہ تقریبات نہ صرف پاکستان کے لذیذ آموں کی عالمی سطح پر تشہیر کا ذریعہ بنتی ہیں بلکہ صحافیوں، سماجی شخصیات اور تارکینِ وطن کو ایک دوسرے کے قریب لانے کا بہترین موقع بھی فراہم کرتی ہیں.

تقریب میں یونائیٹڈ جرنلسٹس فورم کے صدر یحییٰ اشفاق، نائب صدر امداد حسین لک، جنرل سیکریٹری عاطف علی وٹو، ایگزیکٹو ممبر سید فہد جبکہ پاک اوورسیز میڈیا فورم کے صدر راجہ شعیب الطاف، قائم مقام چیئرمین احمد فواد سواتی اور ایگزیکٹو ممبر حنظلہ سواتی سمیت متعدد شخصیات شریک ہوئیں. کمیونٹی کی جانب سے حاجی عثمان، فہد حمید، زبیر خان، عمر خان، آصف احمد، ذیشان رفیق اور دیگر معززین نے شرکت کرکے تقریب کو کامیاب بنایا۔

تقریب خوشگوار ماحول میں اختتام پذیر ہوئی، جہاں شرکاء نے منتظمین کی کاوشوں کو سراہتے ہوئے اس امید کا اظہار کیا کہ آئندہ بھی ایسی ثقافتی اور سماجی سرگرمیاں منعقد ہوتی رہیں گی.