مسعود پوری اور رخشندہ پوری کی میزبانی میں یومِ پاکستان اور عید ملن کی باہمی تقریب کا انعقاد
جدہ رپورٹ ثناء شعیب : پی این پی نیوز ایچ ڈی
یومِ پاکستان اور عید ملن کی باہمی تقریب نہایت جوش و خروش اور ملی جذبے کے ساتھ منعقد کی گئی، جس میں کمیونٹی کی معزز شخصیات نے بھرپور شرکت کی۔ تقریب کے میزبان مسعود پوری اور رخشندہ پوری تھے، جنہوں نے مہمانوں کا پرتپاک استقبال کیا اور ایک منظم و شاندار پروگرام پیش کیا۔ اس موقع پر یومِ پاکستان کی اہمیت کو اجاگر کرنے کے ساتھ عید کی خوشیوں کو بھی بھرپور انداز میں منایا گیا.
تقریب کی مہمانِ خصوصی ڈپٹی قونصل جنرل سعدیہ وقار تھیں، جنہوں نے اپنے خطاب میں یومِ پاکستان کی تاریخی اہمیت پر روشنی ڈالی اور بیرونِ ملک پاکستانیوں کے اتحاد اور ہم آہنگی کو سراہا۔ انہوں نے کہا کہ ایسی تقاریب نہ صرف ہمیں اپنی قومی شناخت سے جوڑتی ہیں بلکہ کمیونٹی میں محبت اور بھائی چارے کو بھی فروغ دیتی ہیں.
دیگر معزز مہمانوں میں مسز زینب منیر، سعدیہ خان، مسٹر عرفان، ابو بکر میمن اور فضل میمن شامل تھے، جنہوں نے تقریب میں شرکت کرکے اس کی رونق کو دوبالا کیا۔ مہمانوں نے میزبانوں کی کاوشوں کو سراہتے ہوئے اس قسم کی سرگرمیوں کو کمیونٹی کے لیے نہایت اہم قرار دیا.
تقریب کے اختتام پر شرکاء نے یومِ پاکستان کی مناسبت سے وطنِ عزیز کی ترقی و خوشحالی کے لیے خصوصی دعائیں کیں اور عید کی خوشیوں کو ایک دوسرے کے ساتھ بانٹا۔ اس خوبصورت باہمی تقریب نے قومی یکجہتی اور خوشیوں کے پیغام کو مزید مضبوط کیا.
