دباؤ اور دھمکیوں سے ایران جھکنے والا نہیں، باہمی احترام پر مبنی سفارت کاری ہی مسائل کا پائیدار حل ہے: مسعود پزشکیان
اسٹاف رپورٹ : پی این پی نیوز ایچ ڈی
ایرانی صدر مسعود پزشکیان نے کہا ہے کہ دباؤ اور دھمکیوں کے ذریعے ایران کو ہتھیار ڈالنے پر مجبور کرنا محض خام خیالی ہے، ایران اپنے قومی مفادات، خودمختاری اور اصولی مؤقف پر کسی قسم کا سمجھوتہ نہیں کرے گا۔ انہوں نے واضح کیا کہ ایران ہمیشہ خطے میں امن، استحکام اور سفارتی حل کا حامی رہا ہے اور جنگ سے بچنے کیلئے ہر ممکن کوشش کی ہے.
سماجی رابطے کی ویب سائٹ ایکس پر جاری اپنے بیان میں ایرانی صدر نے کہا کہ ایران نے مسلسل اپنے وعدوں اور بین الاقوامی ذمہ داریوں کی پاسداری کی ہے۔ انہوں نے کہا کہ تہران نے کشیدگی کم کرنے اور تنازعات کے حل کیلئے ہر راستہ اختیار کیا، تاہم بعض طاقتیں دباؤ اور پابندیوں کے ذریعے ایران کو جھکانے کی پالیسی پر عمل پیرا ہیں جو کبھی کامیاب نہیں ہوگی.
مسعود پزشکیان نے کہا کہ ایران کی جانب سے سفارت کاری کے تمام دروازے آج بھی کھلے ہیں اور اگر باہمی احترام اور برابری کی بنیاد پر مذاکرات کیے جائیں تو مسائل کا حل ممکن ہے. ان کا کہنا تھا کہ دھمکیوں اور طاقت کے استعمال کے بجائے مذاکرات اور احترام پر مبنی سفارت کاری ہی خطے اور دنیا کیلئے زیادہ محفوظ اور پائیدار راستہ ثابت ہوسکتی ہے.
ایرانی صدر نے اپنے بیان میں اس بات پر بھی زور دیا کہ ایران خطے میں امن و استحکام کا خواہاں ہے اور کسی بھی قسم کی جنگ یا تصادم سے بچنے کیلئے سنجیدہ اقدامات کرتا رہا ہے. انہوں نے عالمی برادری پر زور دیا کہ وہ دباؤ کی پالیسی ترک کرکے تعمیری مذاکرات کو فروغ دے تاکہ خطے میں بڑھتی ہوئی کشیدگی کو کم کیا جاسکے.
تجزیہ کاروں کے مطابق ایرانی صدر کا یہ بیان ایسے وقت میں سامنے آیا ہے جب ایران اور مغربی ممالک کے درمیان کشیدگی ایک بار پھر بڑھ رہی ہے اور عالمی سطح پر سفارتی کوششیں جاری ہیں۔ سیاسی مبصرین کا کہنا ہے کہ ایران کی جانب سے مذاکرات پر آمادگی ظاہر کرنا خطے میں ممکنہ کشیدگی کم کرنے کی ایک اہم کوشش تصور کی جارہی ہے.
