ریاض میں پاکستانی فنانس لیڈرز کے اعزاز میں سحری کا اہتمام

ریاض فنانس لیڈرز ہب کے زیر اہتمام سعودی دارالحکومت ریاض میں پاکستانی فنانس لیڈرز کے اعزاز میں ایک پروقار سحری کا اہتمام کیا گیا۔ اس تقریب کی میزبانی ضیاء مصطفیٰ اور عثمان علی نے کی، جس میں سعودی عرب میں مقیم پاکستانی فنانس کمیونٹی سے تعلق رکھنے والی نمایاں شخصیات نے شرکت کی۔تقریب کے میزبانوں کی جانب سے مہمانوں کا پرتپاک استقبال کیا گیا۔ اس موقع پر مبشر خان نے خطاب کرتے ہوئے کہا کہ اس سحری کے انعقاد کا مقصد سعودی عرب میں مقیم پاکستانی فنانس کمیونٹی کو ایک پلیٹ فارم پر اکٹھا کرنا اور وطنِ عزیز پاکستان کی یادوں کو تازہ کرنا ہے۔تقریب میں شرکت کرنے والی شخصیات میں ضیاء مصطفیٰ، محمد دانش، ڈاکٹر محمد عظیم، محمد عثمان، مدثر فاروق، محمد نعمان، زبیر خان بلوچ، عظیم شیخ، شکیل احمد، عمار الحسن، اجمل نیاز، طاہر مقبول، سلمان جاوید،محمد نعیم ، مبشر خان، رضوان علی اور فصیح الدین شامل تھے۔
اس موقع پر شرکاء کے درمیان مشرقِ وسطیٰ کی موجودہ صورتحال اور فنانس کے شعبے میں تیزی سے ہونے والی ڈیجیٹلائزیشن کے رجحانات پر بھی تبادلہ خیال کیا گیا۔ مقررین کا کہنا تھا کہ موجودہ دور میں آڈٹ اور مالیاتی امور تیزی سے ڈیجیٹل نظام کی طرف منتقل ہو رہے ہیں، جس کے باعث پیشہ ورانہ مہارتوں کو جدید تقاضوں سے ہم آہنگ کرنا ضروری ہو گیا ہے۔تقریب سے خطاب کرتے ہوئے ضیاء مصطفیٰ نے کہا کہ سعودی عرب ہمارے لیے دوسرے گھر کی حیثیت رکھتا ہے اور ہم اس کی سلامتی اور ترقی کے لیے ہمیشہ دعاگو ہیں۔ محمد دانش نے کہا کہ ہمیں میزبان ملک کے قوانین اور ضوابط کی پابندی کرتے ہوئے ان کا مکمل احترام کرنا چاہیے۔عظیم شیخ نے فنانس کے شعبے میں درپیش چیلنجز اور سعودی عرب میں نئے آنے والے پیشہ ور افراد کو پیش آنے والی مشکلات کے حل کے لیے کمیونٹی کی جانب سے کی جانے والی کوششوں کو سراہا۔ رضوان علی نے اس بات پر زور دیا کہ موجودہ حالات میں حکومت کی جانب سے جاری کردہ ہدایات پر عمل کرنا انتہائی ضروری ہے، جبکہ عمار الحسن کا کہنا تھا کہ اس طرح کے اجتماعات سے کمیونٹی میں اتحاد اور باہمی روابط کو فروغ ملتا ہے۔سحری کے بعد مہمانوں نے خوشگوار ماحول میں باہمی گفتگو اور یادوں کے تبادلے میں وقت گزارا، جبکہ کمیٹی اراکین نے آئندہ نشست کی تاریخ اور مقام کے حوالے سے بھی ابتدائی مشاورت کی۔
تقریب خوشگوار اور دوستانہ ماحول میں اختتام پذیر ہوئی۔ آخر میں مبشر خان نے ضیاء مصطفیٰ کی شاندار میزبانی کو سراہتے ہوئے امید ظاہر کی کہ مستقبل میں بھی اس نوعیت کی تقریبات کے انعقاد سے فنانس کمیونٹی کے روابط اور اتحاد کو مزید مضبوط بنایا جائے گا۔قریب کے اختتام پر مشرقِ وسطیٰ، بالخصوص سعودی عرب اور پاکستان کے امن، استحکام اور خوشحالی کے لیے خصوصی دعا بھی کی گئی۔