جنرل ساحر شمشاد مرزا کو سعودی عرب میں کنگ عبدالعزیز میڈل آف آنر سے نوازا گیا، دونوں ممالک کے درمیان دفاعی تعاون مزید مضبوط بنانے پر اتفاق
اسٹاف رپورٹ :پی این نیوز ایچ ڈی
پاکستان کے چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے سعودی عرب کے سرکاری دورے کے دوران سعودی مسلح افواج کے چیف آف جنرل اسٹاف جنرل فیاض بن حامد الروییلی سے ملاقات کی۔ ملاقات میں عالمی و علاقائی صورتِ حال، دو طرفہ دفاعی تعاون اور سیکیورٹی شراکت داری کو مزید فروغ دینے پر تبادلۂ خیال کیا گیا۔
دونوں عسکری قیادتوں نے مضبوط بھائی چارے اور دیرپا دفاعی تعلقات کو مزید گہرا کرنے کے عزم کا اعادہ کیا۔ سعودی عسکری حکام نے پاکستان کی مسلح افواج کی پیشہ ورانہ مہارت اور دہشت گردی کے خلاف جنگ میں ان کی قربانیوں کو خراجِ تحسین پیش کیا۔
پاکستان اور سعودی عرب کے درمیان دفاعی تعلقات کے فروغ میں نمایاں خدمات پر جنرل ساحر شمشاد مرزا کو سعودی حکومت کی جانب سے کنگ عبدالعزیز میڈل آف آنر (ایکسِلینٹ کلاس) سے نوازا گیا۔ یہ اعزاز دونوں ممالک کے درمیان دوستی اور دفاعی تعلقات کی مضبوطی کی علامت قرار دیا گیا۔
اس موقع پر جنرل ساحر شمشاد مرزا نے ترک فضائیہ کے کمانڈر جنرل سے بھی ملاقات کی، جس میں باہمی تعاون کے مزید مواقع اور علاقائی امن و استحکام کے لیے مشترکہ کوششوں پر اتفاق کیا گیا۔
