سفارتخانہ پاکستان الریاض میں “طلوعِ سحر” کتاب کی پروقار رونمائی تقریب، ڈاکٹرز، بزنس کمیونٹی اور پاکستانیوں کی بھرپور شرکت

الریاض سعودی عرب شاہین جاوید: پی این پی نیوز ایچ ڈی

سفارتخانہ پاکستان الریاض میں پاکستان ڈاکٹرز گروپ ریاض کی جانب سے طلوع سحر کے عنوان سے شائع کی گئی کتاب کی رونمائی تقریب کا اہتمام کیا گیا جس میں ڈاکٹرز، بزنس مین اور پاکستانی کمیونٹی کی کثیر تعداد نے شرکت کی۔ 1987 سے جاری ڈاکٹرز گروپ کے سفر اور خدمات کی نمائندگی کرتی یہ کتاب ایک اثاثہ ہے جو آنے والی نسلوں تک منتقل ہو گی۔ ڈاکٹرز گروپ کے بانی مرحوم ریاض خواجہ کی خدمات کو سراہا گیا اور پوری ٹیم کو خراج تحسین پیش کیا گیا۔
تقریب سے خطاب کرتے ہوئے مہمان خصوصی ڈپٹی ہیڈ آف مشن سفارتخانہ پاکستان معظم علی کا کہنا تھا کہ طلوعِ سحر اس بات کا واضح پیغام دیتی ہے کہ اگر نیت خالص، مقصد بلند اور جذبہ مضبوط ہو تو اندھیروں میں بھی روشنی کی کرن پیدا کی جا سکتی ہے۔ انہوں نے اس کتاب کو نوجوان نسل کے لیے مشعلِ راہ قرار دیتے ہوئے کہا کہ یہ انہیں خدمتِ انسانیت اور سماجی بھلائی کے جذبے کی جانب راغب کرے گی۔

تقریب سے خطاب کرتے ہوئے پاکستان ڈاکٹرز گروپ کے صدر ڈاکٹر شہزاد، اسد رومی اور ڈاکٹر تنویر کا کہنا تھا کہ یہ کتاب صرف تحریروں کا مجموعہ نہیں بلکہ عزم، خدمت خلق اور انسان دوستی کی ایک روشن مثال ہے۔ اس میں ان تجربات، مشاہدات اور واقعات کو قلم بند کیا گیا ہے جنہوں نے نہ صرف ماضی کی یادوں کو تازہ کیا بلکہ نئی نسل کے لیے بھی رہنمائی کا سامان فراہم کیا ہے۔

کتاب میں تنظیم کی خدمات، جدوجہد اور کمیونٹی ویلفیئر کے مختلف پہلوؤں کو مؤثر انداز میں پیش کیا گیا ہے۔