اقوام متحدہ میں پاکستان کا خط ، سندھ طاس معاہدے کی بحالی کیلئے سلامتی کونسل سے مداخلت کی اپیل
اسٹاف رپورٹ : پی این پی نیوز ایچ ڈی
اقوام متحدہ میں پاکستان کے مستقل مندوب عاصم افتخار احمد نے بھارت کے خلاف ایک اہم خط جمع کراتے ہوئے سندھ طاس معاہدہ کی مکمل بحالی کا مطالبہ کر دیا ہے.
نیویارک میں جمع کرائے گئے اس خط میں پاکستان نے بھارت کی جانب سے معاہدے کی معطلی پر شدید تحفظات کا اظہار کیا اور اسے علاقائی امن کے لیے خطرہ قرار دیا۔ خط میں اقوام متحدہ کی سلامتی کونسل سے اپیل کی گئی ہے کہ وہ مداخلت کرے اور بھارت کو اپنی بین الاقوامی ذمہ داریوں کے مطابق معاہدے پر عملدرآمد کا پابند بنائے.
عاصم افتخار احمد کے مطابق یہ خط نائب وزیراعظم و وزیر خارجہ کی ہدایت پر جمع کرایا گیا، جس میں معاہدے کی مکمل بحالی پر زور دیا گیا ہے۔ مراسلہ اقوام متحدہ کی جنرل اسمبلی کے صدر کے حوالے بھی کیا گیا.
پاکستان کے مستقل مندوب نے اس موقع پر بھارت کی جانب سے پاکستان کی ثالثی کوششوں کے خلاف چلائی جانے والی مبینہ پروپیگنڈا مہم کو بے بنیاد قرار دیا اور عالمی برادری کی توجہ اس جانب مبذول کرائی.
انہوں نے مزید کہا کہ جموں و کشمیر کا دیرینہ تنازع، جو سلامتی کونسل کے ایجنڈے پر موجود ہے، جنوبی ایشیا میں عدم استحکام کی بنیادی وجہ ہے۔ ان کا کہنا تھا کہ خطے میں پائیدار امن اسی صورت ممکن ہے جب اس مسئلے کا حل اقوام متحدہ کی قراردادوں اور کشمیری عوام کی امنگوں کے مطابق نکالا جائے.
