جدہ میں یومِ دفاع پاکستان اور آپریشن بنیان مرصوص کی پہلی سالگرہ کے حوالے سے پروقار تقریب
جدہ (ثناء شعیب، پی این پی نیوز ایچ ڈی)
قونصلیٹ جنرل آف پاکستان جدہ میں پاکستان کے یومِ دفاع اور معرکۂ حق آپریشن بنیان مرصوص کی پہلی سالگرہ کے موقع پر ایک پروقار تقریب کا انعقاد کیا گیا، جس میں قونصلیٹ حکام، کمیونٹی رہنماؤں، صحافیوں اور مختلف شعبہ ہائے زندگی سے تعلق رکھنے والے پاکستانیوں کی بڑی تعداد نے شرکت کی.
تقریب کا آغاز تلاوتِ قرآنِ پاک سے ہوا، جس کے بعد قومی ترانہ پیش کیا گیا۔ تقریب کا مقصد وطنِ عزیز کی سلامتی، افواجِ پاکستان کی قربانیوں اور قومی یکجہتی کو خراجِ تحسین پیش کرنا تھا۔
تقریب سے خطاب کرتے ہوئے قونصل جنرل پاکستان جدہ سید مصطفیٰ ربانی نے کہا کہ “آپریشن بنیان مرصوص” قومی عزم، اتحاد اور دفاعی صلاحیتوں کی روشن مثال ہے، جس نے پوری قوم کو یکجا کر دیا.
انہوں نے کہا کہ افواجِ پاکستان نے ہمیشہ ملک کی سلامتی، خودمختاری اور استحکام کے لیے بے مثال قربانیاں دی ہیں جنہیں قوم کبھی فراموش نہیں کر سکتی.
انہوں نے مزید کہا کہ بیرونِ ملک مقیم پاکستانی وطن سے گہری محبت رکھتے ہیں اور ہر قومی موقع پر اپنے ملک کے ساتھ بھرپور یکجہتی کا اظہار کرتے ہیں۔ قونصل جنرل نے اس موقع پر شہداء اور غازیوں کو خراجِ عقیدت پیش کرتے ہوئے کہا کہ ان کی قربانیوں کی بدولت پاکستان امن اور استحکام کی راہ پر گامزن ہے.
او آئی سی میں پاکستان کے مستقل مندوب سید محمد فواد شیر نے اپنے خطاب میں “معرکۂ حق” کے دوران پاک افواج کی پیشہ ورانہ مہارت اور مؤثر حکمتِ عملی کو سراہتے ہوئے کہا کہ پاک فوج نے بھارتی جارحیت کو ناکام بنا کر قومی دفاع کو مضبوط بنایا۔ انہوں نے کہا کہ پاکستان ایک پرامن ملک ہے جو خطے میں امن، استحکام اور سفارتی حل پر یقین رکھتا ہے.
انہوں نے عالمی برادری پر زور دیا کہ وہ جموں و کشمیر تنازع کے پرامن حل کے لیے اقوامِ متحدہ کی سلامتی کونسل کی قراردادوں کے مطابق اپنا مؤثر کردار ادا کرے.
جدہ کی پاکستانی کمیونٹی کی نمائندگی کرتے ہوئے مسعود پوری، انجینئر عارف مغل اور سردار وقاص عنایت نے اپنے خطاب میں قوم کے عزم، افواجِ پاکستان کی دفاعی صلاحیتوں اور شہداء کی عظیم قربانیوں کو زبردست خراجِ تحسین پیش کیا۔ مقررین نے اس امر پر زور دیا کہ قوم کو اتحاد، یکجہتی اور عزم کے ساتھ پاکستان کی معاشی ترقی، استحکام اور خوشحالی کے لیے بھی مل کر آگے بڑھنا ہوگا.
تقریب کے دوران “آپریشن بنیان مرصوص” پر خصوصی ڈاکیومنٹری بھی پیش کی گئی، جس میں آپریشن کی اہمیت، کامیابیوں اور قومی دفاع میں اس کے کردار کو اجاگر کیا گیا۔ اس موقع پر پاکستان کی سلامتی، ترقی، خوشحالی اور افواجِ پاکستان کی سربلندی کے لیے خصوصی دعا بھی کی گئی.
تقریب کے اختتام پر شرکاء نے پاکستان کے ساتھ اپنی وابستگی اور قومی اتحاد کے عزم کا اعادہ کیا، جبکہ قونصلیٹ کی جانب سے مہمانوں کے اعزاز میں ہائی ٹی کا بھی اہتمام کیا گیا.
