ایران نے آبنائے ہرمز بند کرنے کا اعلان کر دیا

اسٹاف رپورٹ: پی این پی نیوز ایچ ڈی

ایران کی اعلیٰ مشترکہ فوجی کمان نے آبنائے ہرمز کو تمام بحری جہازوں، تیل بردار ٹینکروں اور تجارتی جہازوں کے لیے بند کرنے کا اعلان کر دیا ہے.

بین الاقوامی خبر رساں اداروں کے مطابق ایرانی فوجی قیادت نے کہا ہے کہ موجودہ سکیورٹی صورتحال اور خطے میں بڑھتی ہوئی کشیدگی کے باعث آبنائے ہرمز سے گزرنے والے کسی بھی جہاز کو نشانہ بنایا جا سکتا ہے۔ ایران نے خبردار کیا ہے کہ اس اعلان کی خلاف ورزی کرتے ہوئے گزرنے کی کوشش کرنے والے بحری جہاز فوجی کارروائی کا سامنا کر سکتے ہیں.

آبنائے ہرمز دنیا کی اہم ترین سمندری گزرگاہوں میں شمار ہوتی ہے، جہاں سے عالمی سطح پر تیل اور توانائی کی بڑی مقدار کی ترسیل ہوتی ہے۔ ماہرین کے مطابق اس راستے کی بندش سے عالمی توانائی منڈیوں، تیل کی قیمتوں اور بین الاقوامی تجارت پر گہرے اثرات مرتب ہو سکتے ہیں۔

ایرانی حکام کا کہنا ہے کہ یہ اقدام حالیہ امریکی حملوں اور خطے میں بڑھتی ہوئی فوجی سرگرمیوں کے تناظر میں اٹھایا گیا ہے۔ دوسری جانب عالمی برادری اس پیش رفت پر گہری نظر رکھے ہوئے ہے، جبکہ خدشہ ظاہر کیا جا رہا ہے کہ اس سے مشرقِ وسطیٰ میں کشیدگی مزید بڑھ سکتی ہے.