حج پروازوں کا سلسلہ جاری، ہزاروں عازمین سعودی عرب پہنچ چکے ہیں

اسٹاف رپورٹ : پی این پی نیوز ایچ ڈی

حج 2026 کے سلسلے میں دنیا بھر سے عازمینِ حج کی سعودی عرب آمد کا سلسلہ جاری ہے جبکہ پاکستان سے بھی سرکاری اور نجی حج اسکیم کے تحت ہزاروں حجاج کرام مقدس سرزمین پہنچ چکے ہیں.

وزارتِ مذہبی امور کے مطابق اب تک 126 سے زائد حج پروازوں کے ذریعے 36 ہزار سے زیادہ پاکستانی عازمین سعودی عرب روانہ کیے جا چکے ہیں۔ مختلف شہروں اسلام آباد، لاہور، کراچی، پشاور، کوئٹہ اور ملتان سے روزانہ کی بنیاد پر خصوصی حج پروازیں آپریٹ کی جا رہی ہیں.

ابتدائی مرحلے میں مدینہ منورہ پہنچنے والے عازمین کا پاکستانی حج مشن اور سعودی حکام نے پرتپاک استقبال کیا۔ عازمین کو رہائش، ٹرانسپورٹ اور کھانے پینے سمیت دیگر سہولیات فراہم کرنے کے لیے خصوصی انتظامات کیے گئے ہیں.

سعودی وزارتِ حج و عمرہ کے مطابق رواں برس حج سیزن کے دوران لاکھوں عازمین کی آمد متوقع ہے، جس کے پیشِ نظر ائیرپورٹس، ٹرانسپورٹ، طبی سہولیات اور سکیورٹی کے جامع انتظامات مکمل کر لیے گئے ہیں۔ حکام کا کہنا ہے کہ جدید ٹیکنالوجی اور ڈیجیٹل سسٹمز کے ذریعے حجاج کی رہنمائی اور ہجوم کے انتظام کو مزید مؤثر بنایا گیا ہے.

پاکستانی وزارتِ مذہبی امور نے بتایا ہے کہ مکہ مکرمہ اور مدینہ منورہ میں پاکستانی عازمین کے لیے طبی مراکز اور ہیلپ ڈیسک بھی قائم کیے گئے ہیں، جہاں 24 گھنٹے طبی اور رہنمائی کی سہولیات دستیاب ہوں گی.

عازمینِ حج نے انتظامات پر اطمینان کا اظہار کرتے ہوئے حکومتِ پاکستان اور سعودی حکام کی جانب سے فراہم کی جانے والی سہولیات کو سراہا ہے۔ دوسری جانب قبل از حج پروازوں کا سلسلہ آئندہ چند ہفتوں تک جاری رہے گا.