نامور پاکستانی نژاد سعودی ماہرِ معاشیات ڈاکٹر محمد عمر چھاپرا انتقال کر گئے
اسٹاف رپورٹ : پی این پی نیوز ایچ ڈی
اسلامی معاشیات کے عالمی شہرت یافتہ ماہر، پاکستانی نژاد سعودی دانشور اور محقق ڈاکٹر محمد عمر چھاپرا 93 برس کی عمر میں انتقال کر گئے۔ ان کے انتقال کی خبر سے علمی، اقتصادی اور اسلامی مالیاتی حلقوں میں گہرے رنج و غم کی لہر دوڑ گئی ہے.
مرحوم کی نمازِ جنازہ آج مسجد الحرام میں ادا کی گئی، جس میں بڑی تعداد میں نمازیوں نے شرکت کی، جبکہ بعد ازاں انہیں مکہ مکرمہ کے تاریخی قبرستان جنت المعلیٰ میں سپردِ خاک کر دیا گیا.
ڈاکٹر محمد عمر چھاپرا اسلامی معاشیات کے شعبے میں ایک ممتاز مقام رکھتے تھے۔ انہوں نے سعودی عرب کی مانیٹری ایجنسی (ساما) اور اسلامی ترقیاتی بینک میں اہم ذمہ داریاں انجام دیں اور اسلامی مالیاتی نظام کی تشکیل و فروغ میں نمایاں کردار ادا کیا.
مرحوم نے اسلامی معاشیات، بینکاری اور مالیاتی نظام کے موضوعات پر متعدد تحقیقی کتب اور مقالات تحریر کیے، جنہیں عالمی سطح پر پذیرائی حاصل ہوئی۔ ان کی علمی خدمات نے اسلامی مالیات کو جدید معاشی تقاضوں سے ہم آہنگ کرنے میں اہم کردار ادا کیا.
ان کی گرانقدر خدمات کے اعتراف میں انہیں 1990ء میں معروف بین الاقوامی اعزاز شاہ فیصل انٹرنیشنل ایوارڈ سے نوازا گیا تھا۔ اس کے علاوہ بھی انہیں متعدد قومی اور بین الاقوامی اعزازات حاصل ہوئے.
ڈاکٹر عمر چھاپرا کی وفات اسلامی معاشیات کے میدان میں ایک عہد کے اختتام کے مترادف قرار دی جا رہی ہے۔ علمی و سماجی شخصیات نے ان کے انتقال کو امتِ مسلمہ اور عالمی علمی برادری کے لیے ایک بڑا نقصان قرار دیتے ہوئے ان کی خدمات کو خراجِ عقیدت پیش کیا ہے.
