پی ٹی آئی کارکن صنم جاوید طبیعت ناساز ہونے پر جیل سے اسپتال منتقل
اسٹاف رپورٹ : پی این پی نیوز ایچ ڈی
صنم جاوید کو طبیعت خراب ہونے کے باعث کوٹ لکھپت جیل سے جناح اسپتال منتقل کر دیا گیا.
ذرائع کے مطابق پی ٹی آئی کارکن صنم جاوید کو آنکھ اور معدے میں شدید تکلیف کی شکایت پر فوری طبی امداد کے لیے اسپتال منتقل کیا گیا۔ ان کے شوہر نے میڈیا سے گفتگو کرتے ہوئے بتایا کہ اہلیہ کی طبیعت گزشتہ کچھ دنوں سے ناساز تھی تاہم بیماری کی نوعیت اور مکمل میڈیکل تفصیلات سے اہلخانہ کو آگاہ نہیں کیا جا رہا.
انہوں نے کہا کہ ڈاکٹروں کی جانب سے صنم جاوید کے مختلف طبی معائنے کیے جا رہے ہیں جبکہ اہلخانہ ان کی صحت کے حوالے سے تشویش میں مبتلا ہیں۔ اسپتال انتظامیہ اور جیل حکام کی جانب سے تاحال باضابطہ میڈیکل رپورٹ جاری نہیں کی گئی.
واضح رہے کہ پاکستان تحریک انصاف کی کارکن صنم جاوید کو نو مئی مقدمات میں عدالت کی جانب سے پانچ سال قید کی سزا سنائی گئی تھی، جس کے بعد وہ لاہور کی کوٹ لکھپت جیل میں قید ہیں.
یاد رہے کہ نو مئی واقعات کے بعد مختلف شہروں میں درج مقدمات میں متعدد پی ٹی آئی رہنماؤں اور کارکنوں کے خلاف قانونی کارروائیاں جاری ہیں، جبکہ کئی کارکنان زیرِ حراست یا عدالتی کارروائیوں کا سامنا کر رہے ہیں.
