چین نے ایرانی تیل خریدنے والی 5 کمپنیوں پر امریکی پابندیاں ماننے سے انکار کر دیا، بیجنگ کا یکطرفہ اقدامات کی مخالفت کا اعلان

اسٹاف رپورٹ : پی این پی نیوز ایچ ڈی

چینی وزارتِ تجارت کا کہنا ہے کہ وہ ایرانی تیل خریدنے کے الزام میں نشانہ بنائی گئی 5 کمپنیوں کے خلاف امریکی پابندیوں کی تعمیل نہیں کرے گی.

جاری بیان میں چینی وزارت تجارت نے کہا کہ چین ایرانی تیل کا ایک بڑا خریدار ہے، خاص طور پر چھوٹی اور آزاد ریفائنریوں کے ذریعے جنہیں ٹی پاٹس کہا جاتا ہے، یہ ریفائنریاں کم قیمت پر فروخت ہونے والے ایرانی خام تیل پر انحصار کرتی ہیں.

وزارتِ تجارت کا کہنا ہے کہ وہ امریکی پابندیوں کو تسلیم نہیں کرتی اور چینی کمپنیوں اور اداروں کو بھی ان پر عمل درآمد یا ان کی تعمیل نہیں کرنی چاہیے، چینی حکومت ہمیشہ ان یکطرفہ پابندیوں کی مخالفت کرتی آئی ہے جو اقوامِ متحدہ کی منظوری کے بغیر اور بین الاقوامی قانون کی بنیاد پر نہیں لگائی جاتیں.

گزشتہ روز واشنگٹن نے ایک اور چینی کمپنی پر یہ کہتے ہوئے پابندی عائد کی کہ اس نے ایرانی خام تیل کے کروڑوں بیرل درآمد کیے اور ایران کیلئے اربوں ڈالر کی آمدنی پیدا کی.

یہ نئی پابندیاں ایسے وقت میں سامنے آئی ہیں جب امریکہ اور ایران کے درمیان سفارتی تعطل برقرار ہے، امریکی صدر ڈونلڈ ٹرمپ مئی میں چینی رہنما شی جن پنگ سے مذاکرات کیلئے چین کا دورہ بھی کرنے والے ہیں.