سابق وزیراعظم عمران خان کا آنکھ کے علاج کے لیے عدالت سے رجوع
اسٹاف رپورٹ :پی این نیوز ایچ ڈی
سابق وزیراعظم عمران خان نے آنکھ کے علاج کے سلسلے میں اسلام آباد ہائی کورٹ سے رجوع کر لیا ہے.
سابق وزیراعظم کی جانب سے یہ درخواست ان کے وکیل سردار لطیف کھوسہ نے عدالتِ عالیہ میں دائر کی.
درخواست میں مؤقف اختیار کیا گیا ہے کہ سابق وزیراعظم عمران خان کو آنکھ کے مکمل اور مؤثر علاج کی غرض سے شفا انٹرنیشنل ہسپتال منتقل کرنے کی اجازت دی جائے تاکہ ماہر ڈاکٹروں کی نگرانی میں ان کا تفصیلی طبی معائنہ اور علاج ممکن ہو سکے.
مزید استدعا کی گئی ہے کہ دورانِ علاج بانی پی ٹی آئی کے ذاتی معالج فیصل سلطان اور ڈاکٹر عاصم کو بھی رسائی فراہم کی جائے تاکہ وہ طبی عمل کی نگرانی اور ضروری مشاورت کر سکیں.
درخواست میں مؤقف اپنایا گیا ہے کہ مریض کو مناسب اور بروقت علاج کی سہولت فراہم کرنا اس کا بنیادی حق ہے، لہٰذا عدالت سے استدعا ہے کہ متعلقہ حکام کو فوری ہدایات جاری کی جائیں.
اسلام آباد ہائیکورٹ کی جانب سے درخواست پر سماعت کی تاریخ مقرر کیے جانے کا امکان ہے، جبکہ حکومتی موقف سامنے آنے کے بعد عدالت آئندہ لائحہ عمل طے کرے گی.
