چودھری ارمغان سبحانی کےاعزازمیں ملک منظور حسین اعوان کا افطارو ڈنر
جدہ رپورٹ ثناء شعیب :پی این نیوز ایچ ڈی
ملک منظور حسین اعوان، فوکل پرسن پرائم منسٹر یوتھ پروگرام و مرکزی جنرل سیکریٹری مسلم لیگ (ن) سعودی عرب، کی جانب سے پاکستان سے عمرہ کی سعادت حاصل کرنے کے لیے آنے والے وفاقی وزیر مملکت منصوبہ بندی و خصوصی امور چودھری ارمغان سبحانی، صوبائی سیکریٹری محکمہ آبپاشی پنجاب رانا فیاض علی اور چودھری عثمان کے اعزاز میں مقامی ہوٹل میں شاندار افطار و ڈنر کا اہتمام کیا گیا.
تقریب میں سابق وفاقی وزیر بلدیات و ہاؤسنگ چودھری شہباز حسین، پاکستان انوسٹرز فورم کے صدر چودھری شفقت محمود، جنرل سیکریٹری مہر عبدالخالق، رانا اشرف، ملک عابد، انجینئر سجاد، چودھری امجد گجر، چودھری بلوشیر و رائچ، سردار محمد اقبال یوسف، چودھری ریاض گھمن، رانا عبدالشکور، محسن نواز رانجھا سمیت کمیونٹی کی ممتاز سماجی و کاروباری شخصیات، سعودی برادران اور اخباری نمائندوں کی بڑی تعداد نے شرکت کی.
تقریب کے مہمانِ خصوصی قونصل پاکستان سید مصطفیٰ ربانی تھے، تاہم مصروفیات کے باعث شرکت نہ کر سکے۔ ان کی نیابت پاکستان قونصلیٹ جدہ کے ویلفیئر قونصلر عاکف اقبال نے کی.
عاکف اقبال نے اپنے خطاب میں کہا کہ پاکستان قونصلیٹ جدہ ویسٹرن ریجن کا سب سے بڑا مشن ہے جو پاکستانی کمیونٹی کی بھرپور خدمت انجام دے رہا ہے اور اس کے دروازے ہر وقت سب کے لیے کھلے ہیں۔ انہوں نے میزبان ملک منظور حسین اعوان کی کاوشوں کو سراہتے ہوئے شرکاء کو رمضان المبارک اور سعودی عرب کے یومِ تاسیس کی مبارکباد دی.
وفاقی وزیر مملکت چودھری ارمغان سبحانی نے کہا کہ سعودی عرب میں مقیم پاکستانی محنت اور دیانت سے کام کر کے ملک کا نام روشن کر رہے ہیں۔ انہوں نے پاکستان کی سالمیت اور ترقی کے لیے تمام طبقات کو ایک پلیٹ فارم پر متحد ہونے کی ضرورت پر زور دیا اور کہا کہ ذاتی اختلافات ختم کر کے ملک کی معاشی خوشحالی کے لیے مشترکہ جدوجہد ناگزیر ہے.
انہوں نے میزبان کا شکریہ ادا کرتے ہوئے سعودی قیادت، خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کی صحت و درازیٔ عمر کے لیے دعا بھی کی اور سعودی یومِ تاسیس پر مبارکباد پیش کی.
تقریب کا آغاز حافظ عبدالماجد سلفی کی تلاوتِ قرآن پاک سے ہوا جبکہ نظامت کے فرائض رانا روہیب نے ادا کیے۔ تقریب خوشگوار ماحول میں اختتام پذیر ہوئی جہاں مہمانوں کی پرتکلف افطار و عشائیہ سے تواضع کی گئی.
