مسلم لیگ (ن) ریاض ریجن کے صدر عدنان اقبال بٹ کے زیرِ اہتمام ریاض میں روح پرور محفلِ نعت کا انعقاد
الریاض رپورٹ عالم خان مہمند :پی این نیوز ایچ ڈی
سعودی عرب کے دارالحکومت ریاض میں پاکستانی کمیونٹی کے زیرِ اہتمام ایک روح پرور اور پروقار محفلِ نعت کا انعقاد کیا گیا، جس میں اوورسیز پاکستانیوں اور کمیونٹی کے افراد نے بڑی تعداد میں شرکت کر کے عشقِ رسول ﷺ کا والہانہ اظہار کیا۔ تقریب میں سفارت خانۂ پاکستان کے افسران سمیت مختلف سماجی و مذہبی شخصیات کی شرکت نے محفل کو مزید باوقار بنا دیا۔
محفل کی خاص بات معروف نعت خواں محمد اصغر چشتی کی دلنشین نعت خوانی تھی، جنہوں نے بارگاہِ رسالت مآب ﷺ میں عقیدت کے پھول نچھاور کرتے ہوئے حاضرین پر روحانی کیفیت طاری کر دی۔ محمد اصغر چشتی طویل عرصے سے سعودی عرب میں مقیم ہیں اور پاکستانی کمیونٹی میں اپنی منفرد اندازِ نعت خوانی کے باعث بے حد مقبول ہیں۔
یہ پروقار محفل مسلم لیگ (ن) ریاض ریجن کے صدر عدنان اقبال بٹ کی جانب سے منعقد کی گئی، جس میں نامور نعت خواں محمد اصغر چشتی کے علاوہ محمد افضل بٹ، فضل رحمان، قلب عباس، اویس مصطفی، محمد احتشام، ذکاء اللہ محسن اور دیگر ثناء خواں حضرات نے بھی حضور اکرم حضرت محمد ﷺ کی بارگاہ میں ہدیۂ نعت پیش کیا۔ شرکاء عقیدت و محبتِ رسول ﷺ سے سرشار دکھائی دیے اور محفل کا ماحول نور و سرور سے بھر گیا۔
اس موقع پر خطاب کرتے ہوئے عدنان اقبال بٹ نے کہا کہ رمضان المبارک نزولِ قرآن کا بابرکت مہینہ ہے اور نبی کریم ﷺ کی سیرتِ طیبہ پوری انسانیت کے لیے بہترین نمونہ ہے۔ انہوں نے کہا کہ بیرونِ ملک ایسی مذہبی و روحانی محافل پاکستانی کمیونٹی کو اپنی مذہبی اور ثقافتی روایات سے جوڑے رکھنے میں اہم کردار ادا کرتی ہیں۔
تقریب کے اختتام پر امتِ مسلمہ کی سلامتی، پاکستان کی ترقی و خوشحالی اور عالمی امن کے قیام کے لیے خصوصی دعا کی گئی۔
