ایران کے سپریم لیڈر آیت اللہ علی خامنہ ای امریکی و اسرائیلی حملے میں شہید ہو گئے ہیں

اسٹاف رپورٹ :پی این نیوز ایچ ڈی
ایرانی میڈیا کی جانب سے دعویٰ کیا گیا ہے کہ ایران کے سپریم لیڈر آیت اللہ علی خامنہ ای امریکی و اسرائیلی حملے میں شہید ہو گئے ہیں.
رپورٹس کے مطابق انہیں تہران میں اپنے دفتر میں فرائض کی انجام دہی کے دوران نشانہ بنایا گیا۔ بعض ایرانی ذرائع نے ان کے اہلِ خانہ کی شہادت کی بھی اطلاع دی ہے، تاہم اس حوالے سے بین الاقوامی سطح پر آزادانہ تصدیق تاحال سامنے نہیں آئی.

ایرانی حکومت نے مبینہ شہادت پر ملک بھر میں سات روزہ تعطیل اور چالیس روزہ سوگ کا اعلان کیا ہے۔ سرکاری بیان میں کہا گیا ہے کہ ایران اس حملے کا سخت جواب دے گا.

آیت اللہ علی خامنہ ای 1989 سے ایران کے سپریم لیڈر تھے اور ملکی پالیسی سازی میں کلیدی کردار ادا کرتے رہے۔ حالیہ مہینوں میں ایران اور اسرائیل کے درمیان تناؤ میں نمایاں اضافہ دیکھا گیا تھا، جس کے بعد خطے میں بڑے پیمانے پر تصادم کے خدشات بڑھ گئے تھے.

اسرائیلی میڈیا نے دعویٰ کیا ہے کہ حالیہ کارروائیوں میں ایران کے 40 سے زائد اعلیٰ حکام کو نشانہ بنایا گیا۔ دوسری جانب امریکی اخبار وال سٹریٹ جرنل نے رپورٹ کیا کہ حملے کے دوران مبینہ طور پر 30 بم گرائے گئے اور کارروائی سے قبل انٹیلی جنس سطح پر متعدد اعلیٰ اجلاس منعقد ہوئے.

ایرانی سرکاری میڈیا کے مطابق ایران نے 27 امریکی اور اسرائیلی اہداف پر حملوں کی نئی لہر شروع کر دی ہے۔ ایرانی حکام کا کہنا ہے کہ یہ کارروائیاں دفاعی حکمت عملی” کے تحت کی جا رہی ہیں اور خطے میں موجود امریکی و اسرائیلی تنصیبات کو نشانہ بنایا جا رہا ہے.