پاکستان انٹرنیشنل سکول انگلش سیکشن الریاض میں سالانہ مقابلہ حُسن قرأت 26-2025 کا انعقاد
الریاض رپورٹ عالم خان مہمند :پی این نیوز ایچ ڈی
پاکستان انٹرنیشنل سکول انگلش سیکشن ریاض کے آڈیٹوریم میں سالانہ مقابلۂ حُسنِ قرأت 26-2025 نہایت مذہبی جوش و جذبے اور روحانی فضا میں منعقد ہوا۔ یہ تقریب محض ایک مقابلہ نہیں بلکہ قرآنِ کریم سے وابستگی، سکون و طمانیت اور روحانی بیداری کی خوبصورت عکاسی تھی.
تقریب کے مہمانانِ خصوصی میں مولانا عبدالمالک مجاہد (بانی و مدیرِ اعلیٰ دارالسلام انٹرنیشنل) اور ڈاکٹر اویس محمود (ایسوسی ایٹ پروفیسر، کنگ سعود یونیورسٹی و سربراہ اکیڈمک کمیٹی) شامل تھے، جن کی شرکت نے تقریب کو مزید وقار اور برکت عطا کی۔ اس موقع پر سکول کے پرنسپل جناب محمد تنویر، ونگ ہیڈ مارننگ شفٹ جناب ندیم اقبال اعوان اور ونگ ہیڈ ایوننگ شفٹ جناب محمد ساجد خان بھی موجود تھے.
تقریب کا آغاز تلاوتِ کلامِ پاک سے ہوا۔ جماعت پنجم سے جماعت اے ٹو تک کے طلباء نے خوش الحانی، اعتماد اور اعلیٰ معیارِ قرأت کے ساتھ مقابلے میں حصہ لیا۔ طلباء کی دل سوز تلاوت نے حاضرین کے دلوں کو منور کر دیا اور محفل کو روحانیت سے معطر رکھا.
عمر فاروق کیلانی نے قرآنِ مجید کے موضوع پر ایک خوبصورت نظم پیش کی جسے حاضرین نے بے حد سراہا۔ سر نعمان قریشی نے اپنے خطاب میں قرآنِ کریم کو سمجھنے اور اس پر عمل پیرا ہونے کی اہمیت اجاگر کی، جبکہ سر عبد الرحیم اقبال نے ماہِ رمضان کی آمد کے تناظر میں اس کی روحانی برکات کو اپنانے کا پیغام دیا.
ونگ ہیڈز جناب ندیم اقبال اعوان اور جناب محمد ساجد خان نے مہمانانِ خصوصی کا شکریہ ادا کرتے ہوئے منتظمین حافظ اظہر الدین بدر اور حافظ ابوعبیدہ کی کاوشوں کو خراجِ تحسین پیش کیا۔ شعبۂ قرآن کے اساتذہ کی محنت، طلباء کے نظم و ضبط اور لگن کو بھی سراہا گیا.
اپنے خطاب میں مولانا عبدالمالک مجاہد نے کہا،
لوگوں میں سب سے بہترین وہ ہے جس کا تعلق قرآن سے ہے۔ اگر طلباء دنیا اور آخرت میں کامیابی چاہتے ہیں تو قرآن سے اپنا رشتہ مضبوط کریں، کیونکہ یہی موجودہ دور کی سب سے بڑی ضرورت ہے.
ڈاکٹر اویس محمود نے طلباء کے اعتماد اور حسنِ تلاوت کو سراہتے ہوئے کہا کہ ایسے پلیٹ فارمز نوجوان نسل میں اخلاقی کردار اور روحانی شعور کو فروغ دینے میں اہم کردار ادا کرتے ہیں.
تقریب کے اختتام پر نمایاں پوزیشن حاصل کرنے والے طلباء میں انعامات، تعریفی اسناد اور تحائف تقسیم کیے گئے جبکہ سکول کے پرنسپل محمد تنویر نے مہمانانِ خصوصی اور منصفین کو یادگاری شیلڈز پیش کیں۔ تقریب کا باقاعدہ اختتام مہمانِ خصوصی کی دعا سے ہوا، جس کے بعد شرکاء پر ایک روحانی کیفیت طاری رہی.
