غزہ کی تعمیر نو کیلئے 5 ارب ڈالر فنڈ کا اعلان، ڈونلڈ ٹرمپ کا بورڈ آف پیس کو تاریخی اقدام قرار دیتے ہوئے حماس سے اسلحہ چھوڑنے کا مطالبہ

اسٹاف رپورٹ :پی این نیوز ایچ ڈی

غزہ کی تعمیرِ نو کیلئے 5 ارب ڈالر فنڈ کا اعلان، ڈونلڈ ٹرمپ کا “بورڈ آف پیس” کو تاریخی اقدام قرار دیتے ہوئے حماس سے اسلحہ چھوڑنے کا مطالبہ

امریکی صدر ڈونلڈ ٹرمپ نے اعلان کیا ہے کہ “غزہ بورڈ آف پیس” کے رکن ممالک غزہ کی تعمیرِ نو اور انسانی امداد کے لیے مجموعی طور پر 5 ارب ڈالر فراہم کریں گے۔ صدر ٹرمپ نے یہ بیان اپنے سوشل میڈیا پلیٹ فارم Truth Social پر جاری کیا.

اپنے بیان میں صدر ٹرمپ کا کہنا تھا کہ یہ فنڈز غزہ میں بنیادی ڈھانچے کی بحالی، متاثرہ آبادی کی امداد، طبی سہولیات کی فراہمی اور تباہ شدہ رہائشی علاقوں کی تعمیرِ نو پر خرچ کیے جائیں گے۔ انہوں نے کہا کہ “بورڈ آف پیس” کے قیام کا مقصد خطے میں پائیدار امن، استحکام اور سلامتی کو یقینی بنانا ہے.

صدر ٹرمپ کے مطابق رکن ممالک نے نہ صرف مالی معاونت بلکہ بین الاقوامی استحکام فورس کے قیام کے لیے اہلکار فراہم کرنے کا بھی وعدہ کیا ہے۔ ان کا کہنا تھا کہ مقامی پولیس کی تنظیمِ نو اور تربیت بھی منصوبے کا حصہ ہوگی تاکہ امن و امان کی صورتحال کو مؤثر بنایا جا سکے.

انہوں نے واضح کیا کہ اس منصوبے کی کامیابی کے لیے ضروری ہے کہ حماس طے شدہ معاہدے پر مکمل عملدرآمد کرے اور اسلحہ ترک کرے۔ صدر ٹرمپ نے کہا کہ خطے میں دیرپا امن کے لیے عسکری سرگرمیوں کا خاتمہ ناگزیر ہے.

اپنے بیان میں صدر ٹرمپ نے دعویٰ کیا کہ “بورڈ آف پیس” تاریخ کا سب سے مؤثر بین الاقوامی ادارہ ثابت ہوگا، اور بطور چیئرمین خدمات انجام دینا ان کے لیے اعزاز کی بات ہے۔ انہوں نے مزید کہا کہ عالمی برادری کی مشترکہ کوششوں سے غزہ کو ایک مستحکم اور پرامن خطہ بنایا جا سکتا ہے.