میونخ سکیورٹی کانفرنس کے موقع پر فیلڈ مارشل سید عاصم منیر کی عالمی رہنماؤں سے ملاقاتیں
اسٹاف رپورٹ :پی این نیوز ایچ ڈی
پاک فوج کے شعبۂ تعلقاتِ عامہ (آئی ایس پی آر) کے مطابق چیف آف آرمی اسٹاف فیلڈ مارشل سید عاصم منیر نے جرمنی کے شہر میونخ کا دورہ کیا، جہاں انہوں نے باسٹھویں میونخ سکیورٹی کانفرنس میں شرکت کی اور مختلف ممالک کے اعلیٰ حکام سے اہم ملاقاتیں کیں.
کانفرنس کے موقع پر فیلڈ مارشل سید عاصم منیر کی امریکی وزیر خارجہ Marco Rubio سے ملاقات ہوئی، جس میں علاقائی و عالمی سکیورٹی، انسدادِ دہشت گردی میں تعاون اور باہمی دلچسپی کے امور پر تفصیلی تبادلہ خیال کیا گیا۔ دونوں رہنماؤں نے پاکستان اور امریکہ کے درمیان سکیورٹی تعاون کو مزید مستحکم بنانے کے عزم کا اظہار کیا.
فیلڈ مارشل نے جرمن وزیر داخلہ Alexander Dobrindt سے بھی ملاقات کی، جس میں دوطرفہ دفاعی تعاون اور داخلی سکیورٹی سے متعلق امور زیرِ بحث آئے۔ اس موقع پر جرمن چانسلر کے خارجہ و سکیورٹی پالیسی کے مشیر Gunter Sautter سے ملاقات میں عالمی امن و استحکام کے لیے مکالمے اور اشتراکِ عمل کی اہمیت پر زور دیا گیا.
مزید برآں، جرمنی کے چیف آف ڈیفنس جنرل Carsten Breuer اور فیلڈ مارشل سید عاصم منیر کے درمیان ملاقات میں عصری سکیورٹی چیلنجز اور دفاعی تعاون کے فروغ پر گفتگو ہوئی۔ دونوں ممالک کے درمیان دفاعی تعلقات کو مزید مضبوط بنانے اور کثیرالجہتی تعاون بڑھانے پر اتفاق کیا گیا.
میونخ سکیورٹی کانفرنس کے موقع پر فیلڈ مارشل سید عاصم منیر نے برازیل کی مسلح افواج کے چیف آف جوائنٹ اسٹاف ایڈمرل Renato Rodrigues سے بھی ملاقات کی، جس میں عسکری تربیت، دفاعی تبادلے اور پیشہ ورانہ تعاون کے مختلف پہلوؤں پر تبادلہ خیال کیا گیا.
اسی طرح لبنان کی مسلح افواج کے کمانڈر جنرل Rudolf Haikal سے ملاقات میں علاقائی سکیورٹی صورتحال اور دفاعی اشتراک بڑھانے کے امکانات پر گفتگو کی گئی.
آئی ایس پی آر کے مطابق میونخ سکیورٹی کانفرنس کے موقع پر ہونے والے ان اعلیٰ سطحی سفارتی و عسکری روابط کے ذریعے پاکستان نے عالمی اور علاقائی امن و استحکام کے لیے اپنے مؤقف کا اعادہ کیا اور بین الاقوامی برادری کے ساتھ تعاون بڑھانے کے عزم کا اظہار کیا.
