ریاض، مجلسِ پاکستان کے زیرِ اہتمام الخدمت فاؤنڈیشن پاکستان کے صدر ڈاکٹر حفیظ الرحمن کے اعزاز میں تقریب

ریاض: رپورٹ عالم خان مہمند، پی این نیوز ایچ ڈی

مجلس پاکستان کی جانب سے سعودی دارالحکومت ریاض میں الخدمت فاؤنڈیشن پاکستان کے صدر ڈاکٹر حفیظ الرحمن کے اعزاز میں تقریب کا اہتمام کیا گیا، جس میں اہلیانِ ریاض نے بھرپور شرکت کی۔ عشائیے کی میزبانی رانا عبدالرؤف، سید ثاقب زبیر اور رانا عمر فاروق نے کی۔ تقریب میں سفارت خانہ پاکستان کے ویلفیر اتاشی صاعد عزیز نے خصوصی شرکت کی.

تقریب سے خطاب کرتے ہوئے ڈاکٹر حفیظ الرحمن نے کہا کہ اوورسیز پاکستانی ہمیشہ پاکستان کے سفیر بن کر دنیا بھر میں ملک کا مثبت تشخص اجاگر کر رہے ہیں۔ آپ لوگ پاکستان کی شناخت ہیں اور آپ کی محنت و دیانت ہی پاکستان کا اصل سرمایہ ہے۔

انہوں نے کہا کہ الخدمت فاؤنڈیشن ملک میں ہنرمند افراد کو بااختیار بنانے کے لیے “الخدمت بنو قابل پروگرام” کے تحت عملی اقدامات کر رہی ہے، تاکہ نوجوان جدید ہنر سیکھ کر بیرون ممالک میں روزگار حاصل کریں اور پاکستان کا نام روشن کریں۔

ڈاکٹر حفیظ الرحمن کا کہنا تھا کہ اوورسیز کمیونٹی کا کردار نہ صرف ترسیلاتِ زر تک محدود ہے بلکہ فلاحی، تعلیمی اور سماجی شعبوں میں بھی ان کی خدمات قابلِ تحسین ہیں۔ الخدمت فاؤنڈیشن اوورسیز پاکستانیوں کے مشورں سے ملک میں تعلیم، صحت اور فلاحی منصوبوں کو مزید وسعت دے رہی ہے۔

تقریب کے اختتام پر مہمانوں نے الخدمت فاؤنڈیشن کی خدمات کو سراہا۔