عطا تارڑ کا بیان غیر ذمہ دارانہ، معافی مانگی جائے. بیرسٹر گوہر
اسٹاف رپورٹ :پی این نیوز ایچ ڈی
چیئرمین پاکستان تحریک انصاف بیرسٹر گوہر نے وفاقی وزیر اطلاعات عطا تارڑ کے حالیہ بیان کو انتہائی غیر ذمہ دارانہ اور افسوسناک قرار دیتے ہوئے اس پر سخت ردعمل کا اظہار کیا ہے اور مطالبہ کیا ہے کہ وزیر اطلاعات فوری طور پر قوم سے معافی مانگیں.
بیرسٹر گوہر نے کہا کہ ملک اس وقت ایک نازک مرحلے سے گزر رہا ہے، دہشت گردی کے واقعات میں قیمتی جانیں ضائع ہو رہی ہیں، لوگ اپنے پیاروں کے جنازے اٹھا رہے ہیں اور ہر طرف سوگ کی فضا ہے۔ ایسے حالات میں سیاسی الزام تراشی نہ صرف غیر مناسب بلکہ قومی اتحاد کو نقصان پہنچانے کے مترادف ہے.
ان کا کہنا تھا کہ اس وقت پوری قوم کو یک زبان ہو کر دہشت گردی کی مذمت کرنی چاہیے اور قومی یکجہتی کا مظاہرہ کرنا چاہیے، مگر وزیر اطلاعات کا بیان قوم میں تقسیم پیدا کرنے کی کوشش ہے۔ بیرسٹر گوہر نے کہا کہ دہشت گردی جیسے سنگین مسئلے کو سیاسی مقاصد کے لیے استعمال کرنا افسوسناک عمل ہے.
چیئرمین پی ٹی آئی نے مزید کہا کہ وفاقی وزیر اطلاعات کا یہ کہنا کہ ملک میں دہشت گردی کی واپسی کے پیچھے پی ٹی آئی کا ہاتھ ہے، حقائق کے منافی اور بے بنیاد الزام ہے۔ ایسے بیانات سے نہ صرف قومی اتفاق رائے کو نقصان پہنچتا ہے بلکہ دہشت گردی کے خلاف جاری کوششیں بھی متاثر ہوتی ہیں.
انہوں نے مطالبہ کیا کہ عطا تارڑ اپنے بیان پر فوری طور پر معافی مانگیں اور حساس قومی معاملات پر ذمہ دارانہ طرزِ عمل اختیار کریں.
واضح رہے کہ وفاقی وزیر اطلاعات عطا تارڑ نے لاہور میں پریس کانفرنس کرتے ہوئے دعویٰ کیا تھا کہ ملک میں حالیہ دہشت گردی کے واقعات کے پیچھے پاکستان تحریک انصاف کا کردار ہے، جس پر سیاسی حلقوں میں شدید ردعمل سامنے آ رہا ہے.
