ریاض، یوم یکجہتی کشمیر کی تقریب، کشمیریوں سے بھرپور اظہار یکجہتی
ریاض: رپورٹ عالم خان مہمند، پی این نیوز ایچ ڈی
سعودی عرب کے دارالحکومت ریاض میں یوم یکجہتی کشمیر کے موقع پر ایک پروقار اور پر وقار تقریب کا انعقاد کیا گیا جس میں پاکستانی اور کشمیری کمیونٹی نے بڑی تعداد میں شرکت کی اور کشمیریوں کے ساتھ غیر متزلزل یکجہتی کا اظہار کیا.
تقریب سے خطاب کرتے ہوئے سفارتخانہ پاکستان کے ڈپٹی ہیڈ آف مشن معظم علی نے کہا کہ پاکستان کشمیری عوام کی منصفانہ جدوجہد کی مکمل حمایت جاری رکھے گا اور اس وقت تک ہر فورم پر آواز بلند کرتا رہے گا جب تک مسئلہ کشمیر اقوام متحدہ کی سلامتی کونسل کی قراردادوں کے مطابق حل نہیں ہو جاتا۔ انہوں نے کہا کہ کشمیری عوام کی قربانیاں تاریخ کا روشن باب ہیں اور پاکستان ان کی سیاسی، اخلاقی اور سفارتی حمایت کبھی واپس نہیں لے گا.
اس موقع پر ممتاز کشمیری رہنما سردار عبدالرزاق نے اپنے خطاب میں عالمی برادری پر زور دیا کہ وہ مقبوضہ کشمیر میں انسانی حقوق کی سنگین خلاف ورزیوں کا فوری نوٹس لے اور کشمیری عوام کے بنیادی حق خودارادیت کو یقینی بنانے کے لیے اپنا کردار ادا کرے.
تقریب کے دوران کرن اکبر، حمزہ خان اور معید کیانی نے بالترتیب وزیراعظم پاکستان میاں محمد شہباز شریف، صدر آصف علی زرداری اور وزیر خارجہ اسحاق ڈار کے خصوصی پیغامات پڑھ کر سنائے، جس میں انہوں نے کشمیری عوام کے حق خود ارادیت کی بھرپور حمایت کی اور پاکستان کے اصولی اور دیرینہ موقف کا اعادہ کیا.
شرکاء نے اس عزم کا اظہار کیا کہ کشمیری عوام کی جدوجہد آزادی کو ہر سطح اور ہر فورم پر اجاگر کرتے رہیں گے اور یوم یکجہتی کشمیر کی تقریبات کے ذریعے مسئلہ کشمیر کی سنگینی اور کشمیری عوام کے مصائب سے دنیا کو آگاہ کرتے رہیں گے.
