انقرہ کے قریب طیارہ حادثہ، آرمی چیف اور اعلیٰ فوجی افسران جاں بحق
اسٹاف رپورٹ: پی این نیوز ایچ ڈی
ترکیہ کے دارالحکومت انقرہ کے قریب نجی طیارہ حادثے میں لیبیا کے آرمی چیف آف اسٹاف لیفٹیننٹ جنرل محمد علی الحداد سمیت کئی اعلیٰ عسکری حکام جاں بحق ہو گئے.
لیبیا کے وزیراعظم عبدالحمید دبیبہ نے سوشل میڈیا پلیٹ فارم ایکس پر جاری بیان میں اس افسوسناک واقعے کی تصدیق کرتے ہوئے کہا کہ یہ خبر انہیں شدید دکھ اور صدمے کے ساتھ موصول ہوئی۔ ان کا کہنا تھا کہ حادثے میں آرمی چیف محمد علی الحداد اور ان کے وفد کے تمام ارکان جان کی بازی ہار گئے.
وزیراعظم کے مطابق جاں بحق ہونے والوں میں بری افواج کے چیف آف اسٹاف، ملٹری مینوفیکچرنگ اتھارٹی کے سربراہ، آرمی چیف کے مشیر اور میڈیا آفس کے فوٹوگرافر بھی شامل ہیں۔ عبدالحمید دبیبہ نے اس حادثے کو ملک اور مسلح افواج کے لیے ایک بڑا نقصان قرار دیتے ہوئے کہا کہ لیبیا نے ایسے سپاہی کھو دیے ہیں جنہوں نے نظم و ضبط، خلوص اور قومی جذبے کے ساتھ وطن کی خدمت کی۔ انہوں نے جاں بحق افراد کے اہلِ خانہ، فوجی ساتھیوں اور لیبیا کے عوام سے دلی تعزیت کا اظہار کیا.
دوسری جانب ترکیہ کے وزیر داخلہ علی یرلیکایا نے بتایا کہ لیبیا جانے والا نجی طیارہ انقرہ کے ضلع حایمانا میں گر کر تباہ ہو گیا، جس کا ملبہ تلاش کر لیا گیا ہے۔ ان کے مطابق فالکن 50 طرز کا بزنس جیٹ، جس کا ٹیل نمبر 9H-DFJ تھا، انقرہ کے ایسن بوغا ایئرپورٹ سے مقامی وقت کے مطابق رات 8 بج کر 10 منٹ پر طرابلس کے لیے روانہ ہوا تھا.
وزیر داخلہ کے مطابق پرواز کے تقریباً 42 منٹ بعد رات 8 بج کر 52 منٹ پر طیارے کا کنٹرول ٹاور سے رابطہ منقطع ہو گیا۔ ابتدائی طور پر طیارے کی جانب سے انقرہ کے جنوب میں واقع حایمانا کے قریب ایمرجنسی لینڈنگ کا سگنل موصول ہوا، تاہم اس کے بعد مزید کوئی رابطہ ممکن نہ ہو سکا۔
ترک حکام کے مطابق طیارے میں مجموعی طور پر پانچ افراد سوار تھے، جن میں لیبیا کے آرمی چیف محمد علی الحداد بھی شامل تھے۔ فلائٹ ٹریکنگ ڈیٹا کے مطابق احتیاطی تدابیر کے طور پر ایسن بوغا ایئرپورٹ پر کئی پروازوں کا رخ بھی موڑ دیا گیا.
واضح رہے کہ اس سے قبل ترکیہ کی وزارت دفاع نے تصدیق کی تھی کہ لیبیا کے چیف آف اسٹاف سرکاری دورے پر انقرہ میں موجود تھے، جہاں انہوں نے اپنے ترک ہم منصب اور دیگر اعلیٰ عسکری حکام سے ملاقاتیں کیں۔ یہ دورہ دونوں ممالک کے درمیان جاری عسکری اور سیکیورٹی تعاون کا حصہ تھا.
