جدہ میں ایشیائی خواتین کے کُلینری ٹیلنٹ کا جشن،شگفتہ مناف اور ڈاکٹر سمیرا عزیز توجہ کا مرکز

جدہ رپورٹ-ثناء شعیب :پی این پی نیوز ایچ ڈی

جدہ میں ایشیائی خواتین کی خاندانی اور تخلیقی کھانا پکانے کی مہارتوں کو خراجِ تحسین پیش کرنے کے لیے ایک شان دار کُلینری ایونٹ کا انعقاد کیا گیا۔
اس تقریب کا اہتمام بیک اینڈ کرافٹ کی بانی شیف افشاں منصور نے بز ٹوڈے انٹرنیشنل اور اپنا کچن کے اشتراک سے کیا۔
مقصد ہوم بیسڈ اور ابھرتی ہوئی شیفس کو پلیٹ فارم فراہم کرنا اور ثقافتی ہم آہنگی کو فروغ دینا تھا۔

شیف افشاں منصور نے کہا خواتین کو اپنی تخلیقی صلاحیتیں دوسروں کے ساتھ شیئر کرنے اور ایک دوسرے سے سیکھنے کے مواقع فراہم کرنا ہی اس پروگرام کا اصل مقصد ہے۔

تقریب کی میزبانی صفیہ زوہیب نے کی جبکہ مہمانانِ خصوصی میں سابق سعودی سفارتکار ایچ ای فہد المنصوری شامل تھے۔

تقریب میں خصوصی شرکت کرنے والی ڈاکٹر سمیرا عزیز ،سعودی میڈیا پرسن، رائٹر اور بزنس وومین،ایونٹ کی اہم شخصیت رہیں۔

انہوں نے خواتین کی صلاحیتوں کو سراہتے ہوئے کہا کہ ایسے پروگرام کمیونٹی میں ہنر، ثقافت اور دوستی کو مضبوط کرتے ہیں، اور خواتین کو آگے بڑھنے کا حوصلہ دیتے ہیں۔

ان کی موجودگی نے ایونٹ کی وقار اور اہمیت میں نمایاں اضافہ کیا۔

شگفتہ مناف گیسٹ آف آنر، شرکاء کے لیے حوصلے کی علامت

ایونٹ میں گیسٹ آف آنر شگفتہ مناف نے بھی خصوصی شرکت کی اور خواتین کی محنت، جذبے اور دلکش ڈشز کو بھرپور انداز میں سراہا۔
انہوں نے کہا کہ یہ ایونٹ خواتین کے اعتماد، ہنر اور کمیونٹی ورک کی بہترین مثال ہے۔ ایسے مواقع ہر عورت کو اپنی پہچان بنانے میں مدد دیتے ہیں۔

شرکاء نے ان کی تعریف اور رہنمائی کو اپنی حوصلہ افزائی قرار دیا۔

شرکاء جن میں ردا داؤد، سائمہ شہیر، گلنار اختر اور دیگر شامل تھیں نے بریانی، گلاب جامن، کھیر، کباب، کراہی اور مختلف کیکس سمیت متنوع کھانوں کا شاندار انتخاب پیش کیا۔ تمام شرکاء کو اسناد اور ایوارڈز جبکہ مہمانوں کو تحائف دیے گئے۔

اسپانسر اپنا کچن نے کہا کہ خواتین کا جذبہ اور ان کی محنت اس ایونٹ کی کامیابی کی اصل بنیاد ہے۔