امریکہ چاہتا ہے مؤقف بدلنے کیلئے چین ایران پر دباؤ ڈالے.امریکی وزیر خارجہ مارکو روبیو
اسٹاف رپورٹ: پی این پی نیوز ایچ ڈی
ایک بیان میں مارکو روبیو نے کہا کہ چین ایران کو خلیج میں جاری اقدامات سے پیچھے ہٹنے پر آمادہ کرے، چین کے مفاد میں ہے کہ وہ بحران کے حل میں کردار ادا کرے.
امریکی وزیر خارجہ کا مزید کہنا تھا کہ چین کے اپنے بحری جہاز آبنائے ہرمز میں پھنسے ہوئے ہیں، چین موجودہ بحران سے متاثر ہو رہا ہے.
امریکی وزیر خارجہ مارکو روبیو نے کہا ہے کہ امریکا چاہتا ہے کہ چین، ایران پر دباؤ ڈالے تاکہ وہ خلیج میں کشیدگی بڑھانے والے اقدامات سے پیچھے ہٹے اور آبنائے ہرمز میں بحری آمد و رفت بحال ہو سکے.
مارکو روبیو نے ایک انٹرویو میں کہا کہ چین کو ایران پر اپنا اثر و رسوخ استعمال کرنا چاہیے کیونکہ موجودہ بحران سے سب سے زیادہ متاثر ہونے والے ممالک میں خود چین بھی شامل ہے۔ ان کے مطابق چینی تجارتی اور تیل بردار جہاز آبنائے ہرمز میں مشکلات کا شکار ہیں جبکہ عالمی توانائی کی سپلائی بھی شدید دباؤ میں ہے.
امریکی وزیر خارجہ کا کہنا تھا کہ چین کی معیشت بڑی حد تک خلیجی تیل اور محفوظ سمندری راستوں پر انحصار کرتی ہے، اس لیے بیجنگ کے مفاد میں ہے کہ وہ تہران کو کشیدگی کم کرنے پر آمادہ کرے۔ انہوں نے کہا کہ واشنگٹن اور بیجنگ کے درمیان اختلافات کے باوجود اس معاملے پر دونوں ممالک کے مفادات ایک جیسے ہیں.
رپورٹس کے مطابق امریکا نے اقوام متحدہ میں بھی ایران کے خلاف ایک قرارداد کی حمایت کی ہے جس میں آبنائے ہرمز میں حملے اور بارودی سرنگیں بچھانے سے روکنے کا مطالبہ کیا گیا ہے۔ مارکو روبیو نے چین اور روس سے مطالبہ کیا کہ وہ اس معاملے پر ویٹو استعمال نہ کریں.
واضح رہے کہ آبنائے ہرمز دنیا کی اہم ترین بحری گذرگاہوں میں شمار ہوتی ہے جہاں سے عالمی تیل و گیس کی بڑی مقدار گزرتی ہے۔ ایران اور امریکا کے درمیان بڑھتی ہوئی کشیدگی کے باعث اس راستے میں رکاوٹوں نے عالمی منڈیوں میں بے چینی پیدا کر دی ہے.
