اس بہار میں اک ہی بار میں تنوں سے لپٹ کر درختوں سے کہہ دو یہ درویش

سیدہ نمیرہ محسن شیرازی : پی این پی نیوز ایچ ڈی

اپنے سارے دکھ
اس بہار میں
اک ہی بار میں
تنوں سے لپٹ کر
درختوں سے کہہ دو
یہ درویش
جنگل کے خویش
تیرا ہر درد
امانت سمجھ کر اپنے
تہہ دار سینوں میں
چھپا لیں گے
اپنی جڑوں میں بسالیں گے
اور دھرتی
خاموشی سے
وہ رنج
جس نے تیرے سینے میں چھید کئے
پاتال لے جائے گی
کسی کو نہ سنائے گی
ہاں مگر
جب کبھی نیلے پھول
کاسنی بیلیں
تیرے گھر کے راستے کو
گھر بنا لیں
احترام کرنا
دوجوں کے دکھوں کا
اکرام کرنا