تربت. گھر پر نامعلوم افراد کا حملہ، ایک ہی خاندان کے 6 افراد جاں بحق

اسٹاف رپورٹ :پی این نیوز ایچ ڈی

صوبہ بلوچستان کے ضلع تربت میں افسوسناک واقعہ پیش آیا جہاں نامعلوم مسلح افراد کی فائرنگ سے ایک ہی خاندان کے 6 افراد جاں بحق جبکہ 3 زخمی ہوگئے.

پولیس کے مطابق واقعہ تربت کی تحصیل بلیدہ کے ایک رہائشی علاقے میں پیش آیا، جہاں نامعلوم حملہ آوروں نے گھر میں گھس کر اندھا دھند فائرنگ کر دی۔ فائرنگ کے نتیجے میں خاتون سمیت 6 افراد موقع پر ہی دم توڑ گئے، جبکہ جاں بحق افراد میں ایک کمسن بچہ بھی شامل ہے.

اطلاع ملتے ہی پولیس اور سکیورٹی فورسز کی بھاری نفری موقع پر پہنچ گئی اور علاقے کو گھیرے میں لے لیا۔ نعشوں اور زخمیوں کو فوری طور پر قریبی ہسپتال منتقل کر دیا گیا، جہاں زخمیوں کو طبی امداد فراہم کی جا رہی ہے.

پولیس حکام کا کہنا ہے کہ واقعے کے بعد علاقے کی ناکہ بندی کر دی گئی ہے اور حملہ آوروں کی تلاش کے لیے سرچ آپریشن شروع کر دیا گیا ہے۔ ابتدائی طور پر واقعے کی نوعیت اور محرکات کے حوالے سے کچھ کہنا قبل از وقت ہے، تاہم مختلف پہلوؤں سے تفتیش جاری ہے.

حکام کے مطابق مزید تفصیلات تحقیقات مکمل ہونے کے بعد سامنے لائی جائیں گی.