آج کا دن پوری مسلم اُمہ کے لیے غم اور افسوس کا دن ہے. چیئرمین پاکستان تحریکِ انصاف بیرسٹر گوہر علی خان
اسٹاف رپورٹ :پی این نیوز ایچ ڈی
چیئرمین پاکستان تحریکِ انصاف بیرسٹر گوہر علی خان نے ایران کی حالیہ صورتحال پر سخت ردعمل دیتے ہوئے کہا ہے کہ آج کا دن پوری مسلم اُمہ کے لیے غم اور افسوس کا دن ہے.
اپنے بیان میں بیرسٹر گوہر کا کہنا تھا کہ مسلمانوں کے ساتھ تاریخ میں کبھی ایسا نہیں ہوا۔ ایران کسی ملک کے لیے خطرہ نہیں تھا، اور اپنا دفاع کرنا ہر خودمختار ریاست کا بنیادی حق ہے۔ ایسے حالات میں حملہ کرنا بلا جواز اقدام ہے.
انہوں نے مزید کہا کہ کسی ملک میں ریجیم چینج کے مقصد سے اُس کے لیڈر کو نشانہ بنانا ایک مجرمانہ فعل اور ریاستی دہشت گردی کے زمرے میں آتا ہے۔ انہوں نے اس کارروائی کی شدید الفاظ میں مذمت کرتے ہوئے عالمی برادری سے مطالبہ کیا کہ وہ خطے میں امن و استحکام کے لیے اپنا کردار ادا کرے.
پی ٹی آئی چیئرمین نے مسلم ممالک سے اپیل کی کہ وہ مشترکہ لائحہ عمل اختیار کریں اور خطے کو مزید عدم استحکام سے بچانے کے لیے سفارتی کوششیں تیز کریں.
سیاسی مبصرین کے مطابق پاکستان سمیت مختلف مسلم ممالک کی جانب سے آنے والے بیانات سے ظاہر ہوتا ہے کہ خطے میں کشیدگی کے اثرات عالمی سطح پر محسوس کیے جا رہے ہیں.
