روس، یوکرین جنگ کا کوئی فوجی حل نہیں. پاکستانی مندوب عاصم افتخار

اسٹاف رپورٹ :پی این نیوز ایچ ڈی

اقوام متحدہ سلامتی کونسل کے خصوصی اجلاس میں روس اور یوکرین جنگ کے چار سال مکمل ہونے پر اظہار خیال کرتے ہوئے اقوام متحدہ میں پاکستان کے مستقل مندوب عاصم افتخار احمد نے کہا ہے کہ اس تنازع کا کوئی فوجی حل موجود نہیں اور پائیدار امن صرف مذاکرات کے ذریعے ہی ممکن ہے.

سلامتی کونسل کے اجلاس سے خطاب میں پاکستانی مندوب کا کہنا تھا کہ پاکستان نے ابتدا ہی سے روس اور یوکرین کے درمیان کشیدگی کے خاتمے اور سفارتی حل پر زور دیا ہے۔ انہوں نے یاد دلایا کہ 2022 میں بھی پاکستان نے دونوں ممالک کے درمیان مذاکراتی عمل کی حمایت کی تھی اور آج بھی اسی مؤقف پر قائم ہے.

عاصم افتخار احمد نے کہا کہ جنگ کے تسلسل سے نہ صرف خطے بلکہ عالمی امن و استحکام کو بھی خطرات لاحق ہیں۔ انہوں نے زور دیا کہ فریقین اقوام متحدہ کے چارٹر اور بین الاقوامی قوانین کی روشنی میں بات چیت کا آغاز کریں، تاکہ ایک ایسا حل تلاش کیا جا سکے جو دونوں ممالک کی خودمختاری اور علاقائی سلامتی کو مدنظر رکھے.

پاکستانی مندوب نے مزید کہا کہ انسانی جانوں کے ضیاع اور بنیادی ڈھانچے کی تباہی نے صورتحال کو مزید پیچیدہ بنا دیا ہے، اس لیے فوری جنگ بندی اور بامعنی مذاکرات ناگزیر ہیں۔ انہوں نے عالمی برادری پر بھی زور دیا کہ وہ کشیدگی کم کرنے اور مذاکرات کی راہ ہموار کرنے میں اپنا کردار ادا کرے.

اجلاس میں مختلف رکن ممالک نے بھی جنگ کے اثرات، انسانی بحران اور سفارتی کوششوں پر اپنے خیالات کا اظہار کیا.