ریاض سیزن میں پاکستان ویک کا شاندار آغاز ،ثقافت، موسیقی اور کھانوں کا دلکش امتزاج

ریاض سعودی عرب عالم خان مہمند: پی این نیوز ایچ ڈی

سعودی عرب کے دارالحکومت ریاض میں وزارتِ میڈیا کے زیرِ اہتمام “گلوبل ہارمونی انیشی ایٹو” کے تحت ریاض سیزن میں پاکستان ویک کا رنگا رنگ آغاز ہوگیا۔ یہ خصوصی تقریب 29 نومبر سے یکم دسمبر تک سویدی پارک میں جاری رہے گی، جس کا مقصد پاکستان کی ثقافت، ورثے، موسیقی، آرٹ اور روایتی کھانوں کو عالمی سطح پر اجاگر کرنا ہے۔

افتتاحی روز پاکستان ویک نے سعودی دارالحکومت کی فضاؤں کو پاکستانی رنگوں سے بھر دیا۔ معروف پاکستانی گلوکار ابرارالحق، ستارہ یونس اور دیگر فنکاروں کی شاندار پرفارمنس نے شرکا کو محظوظ کیا، جنہوں نے پاکستانی نغموں اور موسیقی کے ذریعے عوام کو وطن کی یاد تازہ کر دی۔
پاکستانی کمیونٹی سمیت مختلف ممالک کے شہری بھی بڑی تعداد میں اس ایونٹ میں شریک ہوئے۔

ایونٹ میں پاکستانی کھانوں کے خصوصی فوڈ اسٹالز, روایتی ہینڈی کرافٹس, ثقافتی نمائشیں, آرٹ ایکزہیبیشنز، فوک پرفارمنس، اور فیملی انٹرٹینمنٹ زون شامل ہیں، جہاں بچوں اور فیملیوں کے لیے متنوع تفریحی سرگرمیوں کا اہتمام کیا گیا۔

سویدی پارک میں منعقدہ پاکستان ویک نہ صرف پاکستانی تارکینِ وطن کے لیے خوشی کا باعث بنا بلکہ دیگر ممالک کے مہمانوں اور مقامی سعودی شہریوں کے لیے بھی پاکستان کے رنگ، روایت، مہمان نوازی اور ثقافتی خوبصورتی کو قریب سے دیکھنے کا منفرد موقع فراہم کر رہا ہے۔

منتظمین کے مطابق، یہ ایونٹ پاکستان اور سعودی عرب کے درمیان ثقافتی تعاون کے فروغ اور عوامی سطح پر مثبت سفارتی روابط بڑھانے کی اہم کاوش ہے۔