ریاض: مدرسہ تحفیظ القرآن الکریم حلقات رشید بن جبر کے زیرِ اہتمام سالانہ تقریب کا انعقاد

رپورٹ عالم خان مہمند
کیا گیا جس میں 35 حفاظِ کرام کے اعزاز میں پروقار محفل سجائی گئی۔ تقریب میں حفاظ کرام کے والدین، سفارتی افسران اور پاکستانی و مقامی کمیونٹی کی بڑی تعداد نے شرکت کی۔

تقریب کے مہمانِ خصوصی احمد فاروق، سفیرِ اسلامی جمہوریہ پاکستان کے نمائندے ویلفیئر اتاشی نجم الثاقب سمیت سفارتی افسران تھے۔ اپنے خطاب میں انہوں نے کہا کہ قرآنِ کریم ایک مکمل ضابطۂ حیات اور ہدایت نامہ ہے، جس پر عمل پیرا ہو کر انسان دنیا اور آخرت دونوں میں کامیابی حاصل کر سکتا ہے۔ انہوں نے کہا کہ قرآن پاک سے محبت دراصل اللہ تعالیٰ اور اس کے رسول ﷺ کی خوشنودی حاصل کرنے کا بہترین ذریعہ ہے۔ انہوں نے حفاظِ کرام اور ان کے والدین کو دلی مبارکباد پیش کی اور اساتذہ کی کاوشوں کو سراہا۔

مدرسہ کے مشرف الشیخ موسیٰ بن الغامدی اور مکتبہ دارالسلام کے مدیر مولانا عبدالمالک مجاہد نے اپنے تاثرات میں کہا کہ ایسے روح پرور پروگراموں میں شرکت سے لوگوں میں دینِ اسلام اور قرآنِ کریم سے محبت مزید اجاگر ہوتی ہے اور نئی نسل کی دینی تربیت کو فروغ ملتا ہے۔
تقریب میں خالد اکرم رانا ، فیصل علوی، ڈاکٹر حافظ عمران، ڈاکٹر اویس سلفی، انجینئر سلمان راشد سمیت حفاظ کے والدین نے خصوصی شرکت کی

صدر مدرسہ حلقات قاری محمد اسد اقبال نے خطاب کرتے ہوئے کہا کہ گزشتہ 18 برسوں سے پاکستان اور دیگر ممالک سے تعلق رکھنے والے بچے اس ادارے میں قرآنِ پاک حفظ کرنے کے ساتھ ساتھ اسلامی نظم و ضبط اور زندگی گزارنے کے سنہری اصول سیکھ رہے ہیں۔ انہوں نے بتایا کہ طلبہ دنیاوی تعلیم کے ساتھ ساتھ دینی تعلیم بھی متوازن اور مؤثر انداز میں حاصل کر رہے ہیں۔

انہوں نے سعودی قیادت کا خصوصی شکریہ ادا کرتے ہوئے کہا کہ سعودی عرب میں دینی تعلیم کے فروغ اور بچوں کو قرآن و سنت کی تعلیم فراہم کرنے میں بھرپور تعاون کیا جا رہا ہے، جس پر ہم سب ان کے شکر گزار ہیں۔

تقریب کے اختتام پر حفاظِ کرام میں انعامات اور اعزازی شیلڈز تقسیم کی گئیں، جبکہ حاضرین نے بچوں کی کامیابی پر خوشی کا اظہار کیا اور ادارے کی مزید ترقی کے لیے نیک تمناؤں کا اظہار کیا۔