خیبرپختونخوا حکومت نے اسپیشل برانچ کو علیحدہ اسپیشلائزڈ یونٹ بنانے کی منظوری دیدی

اسٹاف رپورٹ: پی این نیوز ایچ ڈی

وزیر اعلیٰ خیبر پختونخوا محمد سہیل آفریدی کی زیرِ صدارت اسپیشل برانچ پولیس سے متعلق ایک اہم اجلاس وزیر اعلیٰ سیکریٹریٹ پشاور میں منعقد ہوا، جس میں وزیر اعلیٰ نے اسپیشل برانچ کو باقاعدہ ایک اسپیشلائزڈ یونٹ اور علیحدہ کیڈر کے طور پر قائم کرنے کی منظوری دی.

وزیر اعلیٰ نے واضح کیا کہ اسپیشل برانچ کو درکار تمام ہیومن ریسورس، ٹیکنیکل ساز و سامان، انفراسٹرکچر اور دیگر سہولیات ترجیحی بنیادوں پر فراہم کی جائیں گی تاکہ اسے صوبے میں انٹیلیجنس اور انسدادِ دہشتگردی کے تقاضوں کے مطابق جدید خطوط پر استوار کیا جاسکے۔

اجلاس میں اسپیشل برانچ میں 1221 نئی اسامیوں کی تخلیق کی اصولی منظوری دی گئی جبکہ اس یونٹ کی استعداد کار بڑھانے کے لیے مجموعی طور پر اربوں روپے کے وسائل مختص کرنے کی منظوری بھی دی گئی۔ وزیر اعلیٰ نے اسپیشل برانچ کے لیے 1820 ملین روپے انفراسٹرکچر اور نئی عمارتوں کے قیام کے لیے، جبکہ 904.7 ملین روپے موٹر وہیکلز کی خریداری کے لیے منظور کیے۔ اس کے تحت اسپیشل برانچ کو 98 گاڑیاں اور 404 موٹر سائیکلیں فراہم کی جائیں گی۔ اسی طرح جدید ٹیکنیکل آلات، ٹیکنالوجی، نگرانی اور انٹیلیجنس سسٹمز کی خریداری کے لیے 2543.9 ملین روپےفراہم کرنے کی منظوری دی گئی۔

وزیر اعلیٰ سہیل آفریدی نے اسپیشل برانچ کے اہلکاروں کے مجوزہ الاونسز کو بھی ترجیحی بنیادوں پر منظوری کے لیے پیش کرنے کی ہدایت کی اور کہا کہ دہشتگردی کے خلاف جنگ میں پولیس کلیدی ستون ہے، اس لیے اسپیشل برانچ کی پیشہ ورانہ استعداد بڑھانے کے لیے تمام ضروری وسائل بلا تاخیر فراہم کیے جائیں گے۔ انہوں نے اس موقع پر صوبے بھر میں اسپیشل برانچ کے لیے نئی عمارتوں کے قیام کی بھی منظوری دی۔

اجلاس کو بریفنگ دیتے ہوئے بتایا گیا کہ اسپیشل برانچ کے اہلکار صوبے میں انٹیلیجنس، سیکیورٹی، ویریفیکیشن، سروے اور سرویلنس کی اہم ذمہ داریاں سرانجام دے رہے ہیں جبکہ ضم شدہ قبائلی اضلاع کے 308 اہلکاروں کو بھی اسپیشل برانچ کا حصہ بنا دیا گیا ہے۔ سال 2025 کے دوران اسپیشل برانچ نے دو خودکش جیکٹس، 32 آئی ای ڈیز، 70 راکٹ شیلز اور 288 ہینڈ گرینیڈز ناکارہ بنا کر کئی ممکنہ دہشتگرد حملوں کو ناکام بنایا، جبکہ گزشتہ سال کے دوران 635 سیاسی اجتماعات کی سیکیورٹی، اسلحہ و ایکسپلوسِو لائسنز کی ویریفیکیشن، 3124 نادرا ویریفیکیشنز، 6840 پاسپورٹ، 14518 سی پیک، 6060 پرسنل اور 9413 سرکاری اہلکاروں کی ویریفیکیشنز بھی انجام دی گئیں۔