علیمہ خان کے ناقابلِ ضمانت وارنٹِ گرفتاری، راولپنڈی پولیس کی ٹیم لاہور روانہ
اسٹاف رپورٹ :پی این نیوز ایچ ڈی
نومبر احتجاج کے مقدمے میں سابق وزیراعظم عمران خان کی ہمشیرہ علیمہ خان کے ناقابلِ ضمانت وارنٹِ گرفتاری جاری ہونے کے بعد راولپنڈی پولیس نے ان کی گرفتاری کے لیے خصوصی ٹیم تشکیل دے دی ہے۔
نجی ٹی وی کے مطابق تھانہ صادق آباد پولیس کی خصوصی ٹیم وارنٹ گرفتاری لے کر آج لاہور روانہ ہوگی۔ وارنٹ میں علیمہ خان کا پتہ 14 اپر مال روڈ، لاہور درج ہے۔
ذرائع کے مطابق انسدادِ دہشت گردی عدالت راولپنڈی نے جمعہ کے روز علیمہ خان کی مسلسل عدم حاضری پر ان کے ناقابلِ ضمانت وارنٹِ گرفتاری جاری کیے تھے۔ عدالت نے ان کی ضمانت دینے والے عمر شریف کے خلاف بھی کارروائی کا عندیہ دیا ہے اگر ملزمہ 20 اکتوبر کو پیش نہ ہوئیں۔
عدالتی ریکارڈ کے مطابق عمر شریف، جو راولپنڈی کے رہائشی ہیں، نے علیمہ خان کی ضمانت کے مچلکے کے طور پر ایک لاکھ روپے جمع کروائے تھے۔ عدالت نے ضامن کو بھی سمن جاری کرتے ہوئے ہدایت کی ہے کہ اگر ملزمہ مقررہ تاریخ کو عدالت میں پیش نہ ہوئیں تو ان کے خلاف عدالتی کارروائی عمل میں لائی جائے گی۔
تھانہ صادق آباد کے نومبر احتجاج کیس میں علیمہ خان سمیت گیارہ ملزمان پر فردِ جرم عائد کی جا چکی ہے۔ استغاثہ نے آئندہ سماعت پر پانچ گواہوں کو طلب کر رکھا ہے۔
پولیس کے مطابق اس مقدمے میں مجموعی طور پر 87 ملزمان کے خلاف چالان پیش کیا گیا، جن میں سے 9 ملزمان اعترافِ جرم پر سزا پا چکے ہیں، جبکہ 66 ملزمان اشتہاری قرار دیے جا چکے ہیں۔
مقدمے کی اگلی سماعت 20 اکتوبر کو مقرر ہے، جس میں علیمہ خان کی حاضری یا گرفتاری کے بعد پیشی کا امکان ظاہر کیا جا رہا ہے۔
