ریاض میں یومِ پاکستان کی پروقار تقریب، سفارت خانے میں پرچم کشائی
ریاض رپورٹ عالم خان مہمند :پی این نیوز ایچ ڈی
ریاض سعودی عرب کے دارالحکومت ریاض میں یومِ پاکستان کے موقع پر سفارت خانہ پاکستان میں پرچم کشائی کی ایک پروقار تقریب منعقد ہوئی، جس میں سفارتی عملے، مسلح افواج کے افسران، خواتین، مردوں اور بچوں کی بڑی تعداد نے شرکت کی.
تقریب کے دوران سفیرِ پاکستان احمد فاروق نے قومی ترانے کی دھن پر قومی پرچم لہرایا۔ اس موقع پر اپنے خطاب میں انہوں نے اتحاد و یکجہتی کی اہمیت پر زور دیتے ہوئے کہا کہ یومِ پاکستان ہمیں اس تاریخی عہد کی یاد دلاتا ہے جب مسلمانانِ برصغیر نے قراردادِ پاکستان پیش کر کے ایک آزاد وطن کے قیام کی بنیاد رکھی.
انہوں نے مزید کہا کہ آج کا دن اس امر کا متقاضی ہے کہ ہم بحیثیت قوم اپنی ذمہ داریوں کو مشترکہ طور پر ادا کریں، باہمی اتحاد کو فروغ دیں اور پاکستان کو ترقی یافتہ ممالک کی صف میں شامل کرنے کے لیے بھرپور کوششیں جاری رکھیں.
سفیرِ پاکستان نے پاک-سعودی تعلقات کو مثالی قرار دیتے ہوئے دفاعی تعاون کو دونوں ممالک کے لیے خوش آئند پیش رفت قرار دیا.
تقریب کے دوران آصف علی زرداری، شہباز شریف اور اسحاق ڈار کے خصوصی پیغامات بھی پڑھ کر سنائے گئے، جنہیں سفارتی افسران کرن اکبر، مواحد کیانی اور صاعد عزیز نے پیش کیا.
