عافیہ صدیقی کیس, وفاق کی اپیل منظور، ہائیکورٹ کو کارروائی سے روک دیا گیا
اسٹاف رپورٹ :پی این نیوز ایچ ڈی
وفاقی آئینی عدالت نے ڈاکٹر عافیہ صدیقی کیس میں وزیرِاعظم اور وفاقی وزراء کے خلاف توہینِ عدالت کی ممکنہ کارروائی سے اسلام آباد ہائی کورٹ کو روک دیا اور فریقین کو نوٹس جاری کرتے ہوئے سماعت ملتوی کر دی.
چیف جسٹس امین الدین خان کی سربراہی میں تین رکنی بینچ نے وفاقی حکومت کی جانب سے دائر اپیلوں پر سماعت کی۔ وفاق نے 16 مئی 2025 کے حکم کو چیلنج کرتے ہوئے مؤقف اختیار کیا کہ درخواست میں ترمیم کی اجازت عدالتی اختیارات سے تجاوز اور طے شدہ مقدمات کی حتمیت کے اصول کے منافی ہے.
اسلام آباد ہائی کورٹ نے اس سے قبل وزیرِاعظم اور وفاقی کابینہ سے امریکا میں قانونی کوششوں کی حمایت نہ کرنے پر وضاحت طلب کی تھی۔ ترمیم شدہ درخواست میں مؤقف اپنایا گیا تھا کہ ڈاکٹر عافیہ صدیقی کی رہائی اور وطن واپسی کے لیے حکومتی اقدامات کو آئینی ذمہ داری قرار دیا جائے.
وفاقی حکومت نے عدالت میں مؤقف اختیار کیا کہ یہ معاملہ خارجہ پالیسی اور بین الاقوامی قانون سے متعلق ہے، اور طویل عرصے بعد نمٹائے گئے معاملے کو دوبارہ کھولنا قانونی اصولوں کے خلاف ہے۔ حکومت کے مطابق اکتوبر 2024 میں وزیرِاعظم نے امریکی صدر کو رحم کی اپیل کی حمایت میں خط لکھا، اعلیٰ سطحی وفد امریکا بھیجا گیا اور قیدیوں کی منتقلی سے متعلق معاہدوں کی کوششیں بھی کی گئیں، تاہم امریکی حکام نے قیدیوں کی منتقلی کے معاہدے پر آمادگی ظاہر نہیں کی.
وفاقی آئینی عدالت نے ابتدائی سماعت کے بعد اسلام آباد ہائی کورٹ کو توہینِ عدالت کی کارروائی سے روک دیا اور مزید سماعت آئندہ تاریخ تک ملتوی کر دی.
