کینیڈا،برٹش کولمبیا میں سکول اور گھر میں اندھا دھند فائرنگ، حملہ آور سمیت 10 افراد ہلاک، 27 زخمی

اسٹاف رپورٹ :پی این نیوز ایچ ڈی

کینیڈا کے صوبے برٹش کولمبیا میں پیش آنے والے فائرنگ کے افسوسناک واقعے میں حملہ آور سمیت کم از کم 10 افراد ہلاک جبکہ 27 زخمی ہو گئے۔ پولیس کے مطابق ملزم نے فائرنگ کے بعد مبینہ طور پر خودکشی کر لی.

پولیس حکام کا کہنا ہے کہ یہ خونریز واقعہ ایک سیکنڈری سکول اور قریبی رہائشی مکان میں پیش آیا۔ ابتدائی اطلاعات کے مطابق سکول کے اندر چھ افراد مردہ پائے گئے، ایک زخمی شخص ہسپتال منتقل کرتے ہوئے دم توڑ گیا جبکہ دو افراد کی لاشیں ایک رہائش گاہ سے برآمد ہوئیں۔

حکام کے مطابق مشتبہ حملہ آور بھی سکول کی عمارت کے اندر مردہ پایا گیا، جس کے بارے میں خیال ظاہر کیا جا رہا ہے کہ اس نے خود کو گولی مار کر زندگی کا خاتمہ کیا.

ریسکیو ذرائع کے مطابق واقعے میں 25 سے زائد افراد زخمی ہوئے جن میں سے دو کی حالت تشویشناک ہے۔ شدید زخمیوں کو ایئر ایمبولینس کے ذریعے قریبی بڑے ہسپتال منتقل کیا گیا ہے جبکہ دیگر زخمیوں کو مقامی طبی مراکز میں طبی امداد فراہم کی جا رہی ہے.

پولیس نے علاقے کو گھیرے میں لے کر تفتیش کا آغاز کر دیا ہے۔ حکام کا کہنا ہے کہ حملے کے محرکات تاحال واضح نہیں ہو سکے اور واقعے کے تمام پہلوؤں کا باریک بینی سے جائزہ لیا جا رہا ہے.

میڈیا رپورٹس کے مطابق یہ واقعہ ایک چھوٹے قصبے میں پیش آیا جہاں آبادی چند ہزار افراد پر مشتمل ہے۔ مقامی کمیونٹی شدید صدمے میں ہے جبکہ تعلیمی ادارے عارضی طور پر بند کر دیے گئے ہیں.

کینیڈین حکام نے متاثرہ خاندانوں سے اظہار تعزیت کرتے ہوئے یقین دہانی کرائی ہے کہ واقعے کی مکمل تحقیقات کی جائیں گی اور حقائق عوام کے سامنے لائے جائیں گے.