سابق وزیراعظم عمران خان کو 190 ملین پاؤنڈ کیس میں سزا سنانے والے جج کی تعیناتی چیلنج

اسٹاف رپورٹ :پی این نیوز ایچ ڈی

سابق سابق وزیراعظم عمران خان کو 190 ملین پاؤنڈ نیب کیس میں سزا سنانے والے جج ناصر جاوید رانا کی تعیناتی اسلام آباد ہائی کورٹ میں چیلنج کر دی گئی ہے۔

درخواست شہری اسامہ ریاض نے اپنے وکیل ریاض حنیف راہی کے ذریعے دائر کی۔ رجسٹرار آفس نے درخواست وصول کرکے ڈائری نمبر جاری کر دیا۔

درخواست میں مؤقف اختیار کیا گیا ہے کہ جج ناصر جاوید رانا کی تعیناتی سپریم کورٹ کے 19 اکتوبر 2004ء کے فیصلے سے متصادم ہے، لہٰذا اس تعیناتی کو کالعدم قرار دیا جائے۔

مزید استدعا کی گئی ہے کہ درخواست کے حتمی فیصلے تک جج ناصر جاوید رانا کو کام سے روکا جائے اور اگر فیصلہ ان کے ریٹائرمنٹ کے بعد ہوتا ہے تو 14 دسمبر 2022ء کے بعد حاصل کی گئی تمام مراعات اور واجبات واپس لینے کا حکم دیا جائے۔

درخواست میں یہ بھی کہا گیا ہے کہ ریٹائرمنٹ کے بعد جج ناصر جاوید رانا کو کسی بھی پنشن یا دیگر فوائد کا حق دار نہ ٹھہرایا جائے۔

واضح رہے کہ جج ناصر جاوید رانا اس وقت ڈسٹرکٹ اینڈ سیشن جج ویسٹ اسلام آباد کے عہدے پر تعینات ہیں اور انہوں نے حال ہی میں سابق وزیر اعظم عمران خان کو 190 ملین پاؤنڈ نیب کیس میں سزا سنائی تھی۔